I qism. Vagonlari elektr uskunalarining qisqacha tavsifi

4. YO‘LOVCHI VAGONI ELEKTR TA’MINOTINING BIR CHIZIQLI PRINSIPIAL ELEKTR SXEMASI
Yo‘lovchi tashiydigan vagonlarda vagon elektr energiya iste’molchilarining radial elektr ta’minot sxemasi qabul qilingan bo‘lib, bunda har bir iste’molchi taqsimlash shitidan o‘z liniyasi bo‘yicha elektr energiya oladi. Ba’zan alohida yoritgichlarni elektr bilan ta’minlashning aralash sxemasi qo‘llanadigan yoritish yuklamasigina bundan istisno bo‘lishi mumkin. Biroq, bir liniyadan bir guruh iste’molchisi sifatida ta’minot oladigan yoritgichlar guruhini ko‘rib chiqa turib (bu ishni faqat bir turdagi iste’molchilar uchun bajarish mumkin), butun elektr ta’minot tizimini radial tizim deb hisoblash mumkin.

Bu tizimni ekspluatatsiyada ancha ishonchli deb aytish mumkin. Liniya shikastlanishi faqat elektr ta’minoti shikastlangan va elektr energiyaning qolgan iste’molchilari ishiga tegishli bo‘lmagan iste’molchi o‘chirilishiga olib keladi. Tizim vagon elektr ta’minot tarmog‘i shikastlangan uchastkasini tuzatishda butun tarmoqni emas, balki faqat shikastlangan uchastkani o‘chirib qo‘yib ta’mirlash imkonini beradi. Elektr ta’minotning radial sxemasining ustun jihatlari ancha ko‘p bo‘lib, uning asosiy kamchiligi – tarmoq yaratish uchun ortiqcha sim sarf qilinishi bilan bog‘liq.

Yo‘lovchi tashuvchi vagon elektr tarmog‘ining prinsipial sxemasi elektr sxema alohida elementlarini shartli belgilashga doir ESKD talablariga rioya qilgan holda chizib olinadi (II qismni qar.). Elektr energiya iste’molchilari va manbalari bir-biridan keyin – gorizontal-oldinma-ketin tarzda joylashib, har bir iste’molchi tagida pastda jadvalning tegishli qismlari – elektr energiyasi iste’molchilari ro‘yxati chizib ko‘rsatilib, ularda elektr energiyasi iste’molchilari va manbalarining qisqacha tavsifi beriladi.

Elektr ta’minot sxemasi va jadval-ro‘yxat vagon elektr ta’minot tarmog‘i elementlarini bundan keyin tanlash uchun asos bo‘lib xizmat qiladi.

Vagon elektr ta’minoti tarmog‘ining prinsipial elektr sxemasi bir chiziqli qilib bajariladi. Unda barcha himoya apparatlari va iste’molchilarni boshqarish apparatlari ko‘rsatiladi.