I қисм. Машинасозлик технологияси асослари I боб. Машиналарни ишлаб чиқариш

19.4. Тешикларга ва шпонка ариқчаларига ишлов бериш

Шатунли бўйинларда 6-10 мм диаметрли 100-220 мм узунликда мой ўтказувчи қия каналлар, асосий бўйинларда эса 7-10 мм диаметрли 25-40 мм узунликда мой ўтказувчи тешиклар ҳосил қилинади. Фланецда, одатда, маҳкамлаш учун 14-16 мм диаметрли 4-6 та тешик пармаланади.
Валнинг фланец томонидаги торецида диаметри 30-50 мм ли, узунлиги 40-70 мм ли подшипник ўтирадиган тешикка ишлов берилади, валнинг олдинги кетида тешик пармаланади, зенкерланади ва резьба очилади. Валнинг олдинги кетида тақсимлагичнинг етакловчи шестерняси ва вентилятор шкиви ўрнатиш учун шпонка ариқчалари ҳосил қилинади. Бу мақсадда йирик серияли ва оммавий ишлаб чиқаришда икки томонлама кўп ўринли агрегатли барабан туридаги дастгоҳлар қўлланилади.
Тирсакли валлардаги мой ўтказувчи каналларни стационар мослама билан жиҳозланган икки томонли кўп шпинделли горизонталь-пармалаш дастгоҳларида ҳосил қилинади.
Тирсакли валлар юк билан биргаликда мувозанатланади, бунда айланма массанинг инерция кучи таъсирида мувозанатсизлиги аниқланади ва мувозанатлаштирилади.

19.5. Тирсакли валларни назоратдан ўтказиш

Тирсакли валларни тайёрлаш жараёнининг ҳар бир энг маъсулиятли операцияларидан кейин бир неча назоратдан ўтказилади.
Якуний назоратдан ўтказишда одатда: а) бўйин, фланец ва вал кети диаметрлари; б) четки асосий бўйинларга нисбатан бўйин ва фланец торецининг тепиши; в) асосий ва шатунли бўйинларининг узунликлари, уларнинг базовий тореци ва фланец қалинлигига нисбатан масофаси; г) барча кривошипларнинг бурчак остида жойлашиши; д) кривошип радиуси; д) биринчи асосий бўйин ўқига нисбатан ўрнатиладиган тешиклар ўқининг жойлашиши; е) биринчи шатунли бўйиннинг сиртига нисбатан шпонка ариқчаси ўқининг жойлашиши ва ўлчами; ж) фланецдаги подшипник учун тешик диаметри ва унинг фланец тореци ёки асосий орқа бўйин торецига нисбатан уриши; з) маховик ости бўйни текширилади.
Охирида бўйинларида тирналганлик, дарзлик, ўсимталар ва бошқаларни аниқлаш мақсадида ташқи сирти кўздан кечирилади.


Синов саволлари

1. 
   Тирсакли валлар нима учун хизмат қилади ва унинг конструктив параметрлари қандай бўлади?
   
2. 
   Тирсакли валлар қандай материаллардан тайёрланади?
   
3. 
   Тирсакли валларнинг заготовкаларини олиш усулларини айтиб беринг.
   
4. 
   Тирсакли валларга механик ишлов бериш кетма-кетлигини айтиб беринг.
   
5. 
   Тирсакли валнинг олдинги кетидаги тешикка қандай ишлов берилади?
   
6. 
   Тирсакли валларнинг бўйинларига қандай ишлов берилади?
   
7. 
   Тирсакли валлар қандай назоратдан ўтказилади?