Hujayra va gen ingenerligi

V - faza - statsionar faza. Bu fazada mikroorganizmlarning biomassa hosil qilish qobiliyati deyarli to’xtaydi, va:
dX / dt = 0
Shuni ham aytib o’tish lozimki, ba`zi bir (ko’p bo’lmagan) mikroorganizmlarning ko’payishi sekin davom etganligi sababli, bu fazada ham biomassaning to’planishi o’ta sekinlik bilan kuzatilishi mumkin. 
Ammo, ko’payish bilan o’lish jarayonlari tobora bir birlariga yaqinlashib borganligi sababli yuqoridagi tenglama o’z o’rnini topadi. O’sishning statsionar fazasiga yetgan mikroorganizmlar eng ko’p miqdorda biomassa yoki hujayra toplagan bo’ladi. Bu ko’rsatkichlar hosildorlik deb ataladi.
Amaliyot nuqtai nazaridan iqtisodiy koeffitsent degan ibora katta ahamiyat kasb etadi. Bu ko’rsatkich hosil bo’lgan biomassa og’irligi bilan ishlatilgan substratlar miqdorini solishtirish imkonini beradi.
Statsionar faza uchun hujayralarning xilma xilligi xarakterlidir. Bu davrda bir necha ko’payishga imkoniyati bor hujayralar qatori, ko’payish xususiyatini yo’qotgan, ammo hozircha tirik, shuningdek o’lik va lizisga uchragan hujayralar ham mavjud bo’ladi. 
VI - faza –o’lish yoki qirilish fazasi ham deb ataladi. Bu faza o’layotgan hujayralar soni ko’payishga qodir hujayralar sonidan ortgan davrdan boshlanadi. Bu fazada hujayra yashashi uchun sharoit yo’q barcha zaxiradagi moddalar ishlatilib bo’lingan bo’ladi.
Mikroorganizmlarni davriy ko’paytirish usuli keyingi asosiy fermentatsiya qaysi usulda olib borilishidan qat`iy nazar ekuv materiallarini tayyorlash uchun keng qo’llaniladi. Doimiy ko’paytirishning afzalliklaridan qat`iy nazar ko’pgina sanoat jarayonlari hanuzgacha davriy ko’paytirish usulida olib boriladi. Bunga asosiy sabab mikroorganizmlar xususiyatlarining o’ta murakkab va tez o’zgaruvchanligidir. Shuning uchun ham mikroorganizmlarning ko’payish va rivojlanish fazalarini yaxshi tahlil qilish ular ishtirokidagi texnologik jarayonlarni muvaffaqiyatli olib borishga asos bo’lib xizmat qiladi.