Ўзбекистон республикаси ички ишлар вазирлиги академияси дастлабки тергов ва криминалистика кафедраси тергов фаолияти мутаҳасислиги

Кўздан кечиришнинг бошланғич нуқтаси. Одатда ҳодиса жойини кўздан кечириш марказдан, яъни тергов учун аҳамиятли бўлган буюмлар ва изларнинг энг кўп миқдори тўпланган жойдан бошланади. Масалан, ўғрилик жинояти эшикни бузиш билан содир этилган бўлса - эшикдан, қотиллик жинояти содир бўлган бўлса мурдадан ва бошқалар.
Кўздан кечиришни дастлаб сиртдан кўздан кечириш билан бошлаш тавсия этилади. Айниқса, бунда:
1) агар, ҳодиса жойининг маркази аниқланмаган бўлса (масалан, оғир тан жароҳати етказилган, жабрланувчи эса касалхонада);
2) агар, чекка жойлардаги изларнинг йўқолиб кетиш эҳтимоли бўлса (масалан, савдо дўконида эшикни бузиш орқали ўғирлик содир этилган, дўкон атрофида транспорт воситасининг изи мавжуд);
3) агар, марказга қараб ҳаракатланиш изларнинг йўқолишига олиб келса (масалан, мурда хоналарга олиб кирувчи тор йўлакнинг охирида жойлашган, полда эса турли буюм ва нарсалар, пойафзалнинг қонли излари мавжуд).⁷
Ҳудудни тозалаб текшириш. Ҳодиса жойини кўздан кечириш жараёнида иш учун муҳим бўлган маълум бир обьектни қидириб топиш мақсадида ҳудудни тозалаб текшириш зарурияти туғилиши мумкин. Бундай ҳаракатни самарали олиб бориш учун қуйидагилар тавсия этилади:

1. 
   тозалаб текширилиши керак бўлган ҳудуд чегараларини белгилаш;
   

2) ҳудудни тозалашда иштирок этадиган шахсларнинг рўйхатини тузиш;
3) ҳудудни тақсимлаш ва шахсларни бириктириш (рўйхатда бириктирилган жойини қайд қилиш);
4) қидирувда фойдаланиладиган техник воситаларни тайёрлаш;
5) қидирув иштирокчиларига йўриқнома ўтказиш (терговчини қизиқтираётган обьектлар тўғрисида, бирор обьект топилганда терговчи билан алоқа ўрнатиш, топилган обьектлар билан муомала қилиш тартиби ва обьект топилганда, қандай ҳаракат қилиш тўғрисида маълумот берилади).
Тозалаб текшириш натижасида қизиқтираётган обьект топилса, ушбу обьектни топган шахс терговчига хабар беради ва терговчи зудлик билан обьект аниқланган жойга бориб, уни топган шахс иштирокида обьектни кўздан кечиради. Кўздан кечириш баённомасида ушбу обьектнинг қаерда ва ким томонидан топилганлиги ҳам қайд этилади.
Ҳудудни тозалаб текшириш натижалари иш материалларида маълумотнома тарзида ўз аксини топади. Маълумотномага иштирок этган шахсларнинг рўйхати ва ҳудуднинг режа-схемаси илова қилинади.