O`quv-uslubiy majmua

Modulni tashkil etish va o’tkazish bo’yicha tavsiyalar

Ona tili va adabiyot fanini o’qitishda zamonaviy yondashuvlar va innovasiyalar fani nazariy va amaliy mashg’ulotlar shaklida olib boriladi. Nazariy mashg’ulotlarda ona tili va adabiyot fanini o’qitishda ilg’or xorijiy tajribalar, zamonaviy yondashuvlar va innovatsion texnologiyalar haqida ma’lumotlar beriladi.

Amaliy mashg’ulotlarda ona tili va adabiyot fanini o’qitishda zamonaviy yondashuvlar va innovatsion texnologiyalarning qo’llanilishi, zamonaviy ta’lim vositalaridan foydalanish usullari, ona tili va adabiyot darsiga qo’yilgan zamonaviy talablar o’rgatiladi. Mashg’ulotlarda texnik vositalardan, ekspress-so’rovlar, test so’rovlari, aqliy hujum, guruhli fikrlash, kichik guruhlar bilan ishlash va boshqa interaktiv ta’lim usullaridan foydalanish nazarda tutiladi.


O’quv modulining o’quv rejadagi boshqa modullar bilan
bog’liqligi va uzviyligi

“Ona tili va adabiyot fanini o’qitishda zamonaviy yondashuvlar va innovasiyalar” o’quv moduli mazmuni o’quv rejadagi “O’zbekiston Respublikasi Prezidentining asarlari va ma’ruzalarida jamiyat rivoji hamda ta’lim-tarbiya masalalari”, “Ilg’or ta’lim-tarbiya texnologiyalari va jahon tajribasi”, “Ta’limda axborot-kommunikasiya texnologiyalari”, “Ona tili va adabiyot fanini o’qitish metodikasi” o’quv modullari bilan uzviy bog’liqlikda o’qitiladi hamda fan o’qituvchilarining kasbiy pedagogik tayyorgarlik darajasini oshirishga xizmat qiladi.

Modulning uslubiy jihatdan uzviy ketma-ketligi

Asosiy qism (ma’ruza)da modulning mavzulari mantiqiy ketma-ketlikda keltiriladi. Har bir mavzuning mohiyati asosiy tushunchalar va tezislar orqali ochib beriladi. Bunda mavzu bo’yicha tinglovchilarga yetkazilishi zarur bo’lgan bilim va ko’nikmalar to’liq qamrab olinishi kerak.

Asosiy qism sifati mavzularning dolzarbligi, ularning ta’lim tizimida amalga oshirilayotgan o’zgarishlar va talablarga, mamlakatimizda bo’layotgan ijtimoiy-siyosiy va demokratik o’zgarishlarga mosligi, O’zbekistonni rivojlantirishning beshta ustuvor yo’nalishi bo’yicha Harakatlar strategiyasida belgilangan vazifalarni qamrab olishi bilan belgilanadi. Mavzularni yoritishda fan va texnologiyalarning so’nggi yutuqlari e’tiborga olinishi tavsiya etiladi.