Физика фани ўқув хонаси ва лаборатория хоналарининг жиҳозланиш талаблари ва хавфсизлик техникаси қоидалари. Физика фанини ўқитишда кўргазма ва тажрибаларни ўтказиш методикаси

Лаборатория ишларини ўтказишда техника хавфсизлиги бўйича қисқача қоидалар
Ўқувчи лаборатория ишини бажаришда қуйидаги қоидаларга риоя қилиши керак:

1. 
   Лабораторияда ишлаганда озодаликка, саранжомликка, тинчликка ва хавфсизлик техникаси қоидаларига риоя қилиш лозим.
   
2. 
   Машғулот пайтида ўқувчининг якка ўзи тажриба ўтказиш мумкин эмас.
   
3. 
   Тажрибани ўқитувчининг ижозати билан бошлаш лозим.
   
4. 
   Ҳар бир лаборатория иши учун лозим бўлган ўлчагич ва асбоблар шу ишга тегишли жойда бўлиши керак.
   
5. 
   Лаборатория ишини бажаришда электр қуввати зарур бўлганда ундан фойдаланиш қоидаларига амал қилиш.
   
6. 
   Ҳар бир лаборатория ишига тегишли қурилма, асбоблар лаборант ва ўқитувчи томонидан текширилиши керак.
   
7. 
   Ҳар бир ўқувчи ўзига топширилиб, бажарилиши лозим бўлган иш ёнида бўлиши керак.
   
8. 
   Тажриба иши тугатилгандан сўнг ўқувчилар олинган натижаларни ўқитувчига кўрсатиши шарт ва лаборатория ишига тегишли бўлган асбоб ва буюмларни лаборантга топшириш керак.
   

Лаборатория хонасида дарсларнинг ўтказилиш тартиби
Лабораторияда ишлаш учун ўқувчилар мустақил ҳолда асосий дарслик, маъруза материаллари ва лаборатория ишлари учун белгиланган қўлланмалардан фойдаланиб, тайёргарлик кўради.
Ишни бошлашдан олдин ўқувчилар ўқитувчига иш тартибини ва шу ишга доир назарий маълумотларни айтиб бериши керак. Ўқувчининг жавоби қониқарли деб топилгач, ўқитувчи унга тажрибани бажаришга рухсат беради. Лаборатория иши учун алоҳида лаборатория дафтари ва ўқитувчининг журнали тутилади. Дафтарга тажриба давомида олинган иш натижалари ўз вақтида қайд қилиниб борилади. Лаборатория дафтари асосан қуйидаги тартибда тутилади:
а) машғулот ўтказилган кун, ишнинг тартиб рақами ва унинг номи;
б) лаборатория ишига тааллуқли қисқача назарий қисми;
в) лаборатория ишни бажаришнинг қискача тафсилоти;
г) иш бажариладиган қурилманинг чизмаси;
д) топиладиган физик катталикнинг формуласи;
г) олинган натижалар жадвалда қайд қилинган бўлиши керак.
Барча ўлчашлар етарлича юқори аниқликда ўтказилиб, тажриба натижаларини охиригача ҳисоблаб, ўқитувчига кўрсатилади ва ўқитувчи ўз журналига ҳамда талаба дафтарига тегишли белгини қўйиб қўяди.