Hech qachon taslim bo’lma!

Hech qachon taslim bo’lma!

Ushbu masal bir chol va uning qari xachiri haqida. Kunlardan bir kuni cholning qari xachiri quduqqa tushib ketibdi va bor ovozicha hangray boshlabdi. Nima bo’lganini tushunib yetgan chol tezda yetib kelibdi va u yoqdan bu yoqqa yurib qanday yordam berish kerakligi haqida bosh qotiribdi va oxiri bu qurigan quduq ham, qarigan xachir ham bu mashaqqatga arzimaydi, degan qarorga kelibdi. Keyin qo’shnilarini chaqirib, vaziyatni tushuntiribdi va xachirni shu eski quduqqa ko’mib yuborishda ulardan yordam so’rabdi.

Daf’atan tepadan tuproq tushayotganini tushungan xachir esankirab qoldi. Shu payt yaxshi maydalanmagan kesak uni orqasiga zarb bilan tushgach miyasida chiroq yongandek bo’ldi va ajoyib reja pishib yetildi. Har safar uning ustiga tuproq kelib tushganda, u silkinib, oyog’i ostiga tushgan tuproqni tepalay boshladi. “Silkitib tashla..! Tepala..! Silkitib tashla..! Tepala..!”, - tez-tez takrorlay boshladi xachir. U o’ziga shu tariqa dalda berardi. Har safar tepadan qattiqroq kesak yo tosh tushganda uning joni og’rirdi, albatta. Ammo u vahimaga qarshi jasorat ko’rsata oldi va tez orada yuqoridan tushayotgan tuproq va kesaklar hisobiga quduq ko’milayotganligini, o’zi esa tobora yuqorilayotganini his qildi va kurashda davom etdi va yer yuziga yaqin qolganda u sakrab chiqib ketdi.
Eng muhimi, u eng og’ir damlarda ham taslim bo’lmasdan ilojsizdek ko’ringan ishni ham uddaladi. Shunday ekan, hech qachon taslim bo’lma!!!

Muallif kimligi ma’lum emas
Tarjimon: Abduraimov Temur