Hayvonlar morfologiyasi

Epiteliy to‘qimasining gistopreparatlarini o‘rganish mavzusidagi
laboratoriya darsining (2 soat)
Darsning maqsadi:
1. “To‘qima”, “epiteliy”, “bir qavatli epiteliy” va “ko‘p qavatli epiteliy” tushunchalari bilan tanishish;
2. Bir qavatli kubsimon va ko‘p qavatli yassi epiteliy preparatlarini o‘rganish, chizish va belgilash;
3. Epiteliy va bezlar klassifikatsiyasi sxemasini, nefronning bir qavatli kubsimon epiteliyi elektronogrammasini chizish hamda belgilash; biriktiruvchi Yumshoq va retikulyar to‘qimalarni o‘qib kelish; tavsiya qilinadigan ro‘yxat bo‘yicha atamalar lug‘ati tuzish.
Ko‘rgazmali asbob-uskunalar va jihozlar:
Mikroskop, gistopreparatlar.
Mashg‘ulotning o‘tkazilish tartibi:
- Quyon buyragi siydik naychalari devoridagi bir qavatli kubsimon epiteliy sini o‘rganish.
- Ko‘p qatlamli yassi kuchsiz shoxlanuvchi epiteliy (epidermal tipdagi epiteliy). Buzoq ko‘zi shox pardasining vertikal kesimini o‘rganish.
- Preparatni videokamerali mikroskopda ko‘rsatish.
Darsning mazmuni:Bir va ko`p qavatli epiteliy to`qimasi
Preparat. Quyon buyragi siydik naychalari devoridagi bir qavatli kubsimon epiteliy.
Temirli gematoksilin bilan Geydengayn usuli bo‘yicha va Mallori aralashmasi bilan bo‘yalgan (15-rasm).
Buyrak kanalchalari o‘z uzunligining katta qismida kubsimon epiteliydan hosil bo‘lgan. Lekin, buyrakning chuqur qismlarida joylashuvchi siydik yig‘uvchi naychalar deb ataluvchi strukturalar devorida bu epiteliyning o‘ziga xosliklari bilan tanishish eng qulay. Bu naychalarda epiteliy turli balandlikda bo‘ladi, kubsimon epiteliydan iborat naychalar bilan bir qatorda, bo‘yi balandroq, prizmatik epiteliy bilan qoplanganlarini ham topish mumkin. Kanalchalar orasida kam miqdorda qon kapillyarlariga ega bo‘lgan biriktiruvchi to‘qima joylashadi.
Kichik ob’ektivda qisman ko‘ndalangiga, qisman qiyshiq yoki uzunasiga kesilgan ko‘pdan-ko‘p kanalchalar ko‘rinadi. Hujayralarining chegaralari yaxshi bilinadigan (yaxshiroqi yoki ko‘ndalang, yoki qat’iy uzunasiga kesilgan) kanalchani tanlash, katta ob’ektivda o‘rganish va chizish kerak. Epiteliyning hujayralari taxminan bir xil balandlik, kenglikka ega bo‘lib, bu kubsimon epiteliy uchun xarakterlidir. Bizning preparatimizda hujayralarning chegaralari (1) juda aniq ingichka chiziqlar ko‘rinishiga ega, bu yerda hujayralararo yoriqlar ko‘rinmaydi. Epitelial hujayralarning o‘zaklari (2) yumaloq va hujayraning o‘rtasida joylashgan. Kubsimon epiteliyni o‘zaklarining shakli va ularning joylanishiga ko‘ra hujayralarning chegaralari aniq ko‘rinmaganda ham aniqlash mumkin. Epitelial hujayralarda kanalcha bo‘shlig‘iga qaragan apikal uchini (3) va biriktiruvchi to‘qimaga qaragan bazal uchini (4) farq qilamiz. Epiteliy va biriktiruvchi to‘qimani bazal membrana (5) ajratib turadi. Hujayralarning apikal uchlari orasida, kesimda hujayralar erkin qirralari orasida joylashuvchi qoramtir ponachasimon bekituvchi plastinkalar (6) ko‘rinadi. Epiteliyning qiyshiq kesimlarida ba’zan yuzaga parallel kesilgan bekituvchi plastinkalarni topish mumkin; bu holda bekituvchi plastinkalar hosil qiluvchi shakl asalari uyasi (mumkatak)ni eslatadi. Yaxshi fiksatsiya qilingan va bo‘yalgan preparatlarda epiteliy hujayralarning apikal uchida hujayra markazi (sentrosoma) hisoblangan, biri ostiga biri joylashgan ikki sentrioldan iborat diplosoma (7) ni topish mumkin. Epitelial naychalar atrofida biriktiruvchi to‘qima (8) ko‘rinib, uning tolalari bizning preparatimizda ko‘k rangga bo‘yalgan. Bu biriktiruvchi to‘qimada ko‘pincha uchburchak yoki yoriqsimon bo‘shliqqa ega ingichkaroq naychalar uchrab, ular yassi epitelial hujayralardan (9) tuzilgan va bu hujayralarni siydik yig‘uvchi, naychalarning kubsimon hujayralari bilan solishtirish qulay. Bundan tashqari, biriktiruvchi to‘qimada naychalar atrofida kapillyarlar (10) uchrab, ularning devori kesimda, endoteliotsitlarning o‘zaklari (11) joylashgan joylarda qalinlashgan, yupqa parda ko‘rinishidagi endoteliydan iborat. Biriktiruvchi to‘qimada tolalar orasida hujayralar uchraydi; biriktiruvchi to‘qima hujayralarining asosan o‘zaklari (12) ko‘rinadi.