Халқ таълими олдида турган асосий вазифалардан бири ёшларни ақлий, ахлоқий жиҳатдан баркамол шахс қилиб шакллантиришдир

Битирув малакавий ишнинг илмий фарази.
Бизнинг тахминимизча, билим олишга бўлган эҳтиёжнинг ривожланишида ўқув мотивлари етакчи рол ўйнаши мумкин ва бунда ўқувчининг ўқув предметларига бўлган қизиқишлари, қизиқишнинг юзага келишига таъсир этувчи омиллар билим олишдаги муваффақиятлардан бири бўлиши эҳтимол.
Битирув малакавий ишнинг методлари.
1. Ўқувчи ёшларнинг билим олиш эҳтиёжларини ўрганиш мақсадида кузатув ва суҳбатлар ўтказиш.
2. Ўқувчиларнинг ўқув мотивларини М.И.Матюхина методикасининг Э.Ғозиев модификацияси бўйича экспериментал тадқиқ этиш.
3. Синф жамоасининг ўқув қизиқишларини ўрганиш методикасини ўтказиш.
4. Синф жамоасининг мактабдан ташқари қизиқишларини ўрганиш методикасини ўтказиш.
5. Олинган натижаларни математик-статистик ва психологик таҳлил қилиш.
Битирув малакавий ишнинг объекти.
Ўқувчи ёшларнинг билим олиш эҳтиёжларини ўрганиш учун Қува тумани 41-умумтаълим ўрта мактаби 9-синф ўқувчилари танланди. Тадқиқотда жами 50 нафар респондент иштирок этди. Ўқувчи ёшларнинг тадқиқот объекти қилиб танланишининг асосий сабабларидан бири - бу даврнинг инсон шахсининг шаклланишидаги ижтимоий аҳамияти ва ижтимоийлашув жараёнининг шахс тараққиётида етакчи ўрин эгаллаши билан тушунтирилади.
Битирув малакавий ишнинг предмети бўлиб, таълим жараёнида шаклланадиган билим олишга эҳтиёжни ривожалантирувчи омиллар ҳисобланади. Таълим жараёнининг самарадорлиги ҳар бир алоҳида олинган таълимий тадбирларнинг муваффақиятига боғлиқ. Мамлакатимизда таълим соҳасида амалга оширилаётган туб ислоҳотлар, педагог-устозларнинг ақлий, маънавий ва аҳлоқий ривожланишидаги сифат ўзгаришлари ўқитувчиларни янгича вазиятда, янгича педагогик таъсир усул ва воситаларидан самарали фойдаланган ҳолда ўқувчиларнинг билим олиш эҳтиёжларини ривожлантириши лозим. Чунки, юртбошимиз И.А.Каримов айтганидек: “Тарбиячи-устоз бўлиш учун, бошқаларнинг ақл-идрокини ўстириш, маърифат зиёсидан баҳраманд қилиш, ҳақиқий ватанпарвар, ҳақиқий фуқаро этиб етиштириш учун, энг аввало, тарбиячи ана шундай юксак талабларга жавоб бериши, ана шундай буюк фазилатларга эга бўлиши керак”⁸. Ўқитувчининг асосий вазифаси ёшларнинг билим олишга эҳтиёжини ҳосил қилувчи қизиқишларни ривожлантириш ҳисобланади.