Халқ таълими ходимлари асосий лавозимларининг малака тавсифлари

38-§. Туман (шаҳар) Халқ таълими бўлими Таълим сифати мониторинги бўлими ходимларининг (Бош инспектор-методист ва инспектор-методист)
лавозими малака тавсифлари

Тартиб рақами	296	1359
Машғулотларнинг миллий стандарт классификатори бўйича коди	1229	2341
Ходимлар тоифаси	Бошқарув	Мутахассис

113. Лавозим вазифалари:

а) гуруҳга юкланган барча вазифалар бажарилишини таъминлаш, таълим сифатини яхшилаш масалалари бўйича семинар ва конференциялар ўтказиш;
б) гуруҳнинг йиллик иш режасини, таълим муассасалари мониторинги режа-жадвали ва дастурини тузиш ҳамда ижросини таъминлаш;
в) таълим муассасаларининг ўқув-тарбия жараёнини яхшилаш бўйича фаолиятини мувофиқлаштириш ва мониторингини олиб бориш;
г) мониторинг жараёнини ташкил этиш ва ўтказишга, халқ таълими ходимларини қайта тайёрлаш ва уларнинг малакасини ошириш ҳудудий институтларининг ўқитувчилари, методика марказлари методистлари, тажрибали амалиётчи ўқитувчилардан иборат жамоатчи экспертларни жалб этиш;
д) методик хизмат ходимлари, ўқитувчилар билан бирга назорат материаллари базасини шакллантириш, синфлар, фанлар ва мавзулар кесимида тайёрланган ушбу материалларни мунтазам тўлдириб бориш;
е) методик хизмат ходимлари билан ўзаро ҳамкорлик қилиш, ўқувчилар билимида аниқланган камчиликларни бартараф этиш масалалари бўйича фаолиятни амалга ошириш;
ж) туман таянч таълим муассасалари негизида таълим сифатини мониторинг қилиш ва уни такомиллаштириш, янги педагогик ва ахборот-коммуникацион технологияларни жорий этиш тадбирларини ўтказиш;
з) умумий ўрта таълим мактабларида ўқувчилар билимларининг давлат таълим стандартлари талабларига, мактабгача таълимга қўйилган давлат талаблари ҳамда мактабдан ташқари таълимга қўйилган давлат талабларига мослигини мониторинг қилиш;
и) санитария-гигиена талаблари, меҳнатни муҳофаза қилиш, техника ва ёнғин хавфсизлиги қоидалари талабларига риоя қилиш.
к) касбий одоб-ахлоқининг умумий принциплари ва хизматдаги хулқ-атворининг асосий қоидаларига амал қилиш.
114. Билиши лозим:
а) давлатимизнинг халқ таълимига оид ва болалар ҳуқуқларини тартибга солувчи норматив-ҳуқуқий ҳужжатларини;
б) мутахассислиги бўйича янгиликларни, психология-педагогика фани ютуқларини ва уни ҳаётга татбиқ этиш йўлларини;
в) методик ишларни ташкил этиш ва самарадорлигини ошириш усулларини;
г) ўқувчиларнинг давлат таълим стандартлари талаблари даражасида ўзлаштириш мониторингини олиб бориш ва аниқланган камчиликларни бартараф этиш йўлларини;
д) давлат таълим стандартлари, ўқув режа, ўқув дастури ва бошқа ўқув-методик ҳужжатларнинг мазмуни ҳамда ўқув жараёнига татбиқ этиш йўлларини;
е) дарсларни таҳлил қилиш, илғор педагогик технологиялар ва уларни татбиқ этиш методларини, жамоада қулай психологик муҳит яратишни;
ж) санитария-гигиена талаблари, меҳнатни муҳофаза қилиш, техника ва ёнғин хавфсизлиги қоидаларини.
115. Малака талаблари:
а) камида бакалавр даражасидаги олий педагогик маълумот;
б) хорижий тиллардан бирининг бошланғич босқичини ва ахборот-коммуникация технологияларидан фойдаланишни билиши;
в) уч йилдан кам бўлмаган педагогик иш стажи.


39-§. Туман (шаҳар) Халқ таълими бўлими фанлар бўйича методист, Дарсликлар бўйича методист, ўқув-ишлаб чиқариш мажмуалари фаолиятини ташкил этиш бўйича методист лавозимининг малака тавсифлари

Тартиб рақами	1718	1729
Машғулотларнинг миллий стандарт классификатори бўйича коди	2341	2341
Ходимлар тоифаси	Мутахассис	Мутахассис

116. Лавозим вазифалари:

а) ўз методистлик йўналишида (қамраб олинган фанлар бўйича) ҳар бир ўқув фанларининг ўқитилиши бўйича метод бирлашмалар ва методик кенгашлар ишларига амалий ва методик ёрдам беришни таъминлаш;
б) ўз методистлик йўналишида (қамраб олинган фанлар бўйича) ҳар бир ўқув фанларидан ўқувчилар билимининг давлат таълим стандартларига мослиги мониторинги натижалари бўйича чора-тадбирлар ишлаб чиқиб, камчиликларни бартараф этиш ишларини ташкил этиш;
в) ўз методистлик йўналишида (қамраб олинган фанлар бўйича) ўқувчилар билим даражаси, оралиқ, босқичли назорат ишлари ва якуний аттестация натижаларини ўрганиб таҳлил қилиш, аниқланган камчиликларни бартараф этиш юзасидан тавсиялар тайёрлаш ва уни таълим муассасаларига етказиш;
г) ўз методистлик йўналишида (қамраб олинган фанлар бўйича) ўқитувчиларни ўқув тарбия жараёнида илғор педагогик ва ахборот технологияларини жорий этиш бўйича методик тавсия ва қўлланмалар билан таъминлаш;
д) ўз методистлик йўналиши (қамраб олинган фанлар бўйича) методик ишларни мувофиқлаштириш, турли синовлар натижаларини таҳлил қилиш, янги ўқув методик қўлланма ва дарсликлар синови бўйича материаллар тайёрлаш, янги методик адабиётлар тўғрисидаги маълумотларни ўқитувчиларга етказиш;
е) ўз методистлик йўналишида (қамраб олинган фанлар бўйича) ўқитувчиларни ўқув-тарбия жараёнида илғор педагогик ва ахборот-коммуникацион технологияларни жорий этиш бўйича методик тавсия ва қўлланмалар билан таъминланишида ёрдам бериш, улардан фойдаланишни ташкил этиш;
ж) ўз методистлик йўналишида (қамраб олинган фанлар бўйича) таълим-тарбияни ривожлантиришга ва сифатини оширишга оид турли анжуман, илмий-амалий конференциялар, ўқувлар кўрик-танловлар (энг яхши дарс ишланмаси, энг яхши фан хонаси ва бошқалар), август кенгашлари, илмий-амалий йиғилишларни ташкилаштириш ва ўтказилишини таъминлаш;
з) ўз методистлик йўналишида (қамраб олинган фанлар бўйича) мактаб ва туман (шаҳар) миқёсидаги беллашувларни ўтказиш, унинг натижаларини таҳлил қилиш ҳамда методик тавсиялар ишлаб чиқиш;
и) ўз методистлик йўналишида (қамраб олинган фанлар бўйича) давлат таълим стандартлари ва ўқув дастурлари тажриба-синови ишлари бўйича тажриба майдонлари фаолиятига методик ёрдам кўрсатиш;
к) ўз методистлик йўналишида (қамраб олинган фанлар бўйича) ёш мутахассисларнинг малакасини ошириш ва касбий тайёргарлигини такомиллаштириш бўйича ишларни амалга ошириш;
л) мактаб ўқитувчилари дарсларини таҳлил қилиш ва уларга методик ёрдам кўрсатиш;
м) туман таянч таълим муассасалари негизида методистлик йўналишида (қамраб олинган фанлар бўйича) фаннинг ўқитилиш сифатини ошириш, илғор педагогик ва ахборот-коммуникация технологияларини жорий этишга оид семинар ва конференциялар ўтказиш, юзага келаётган муаммоларни бартараф этиш чора-тадбирларини ишлаб чиқиш;
н) ўз методистлик йўналишида (қамраб олинган фанлар бўйича) ўқитувчилар тўғрисида маълумотлар базасини яратиш ва уларнинг малакасини ошириш истиқбол режаларининг бажарилишини таъминлаш;
о) санитария-гигиена талаблари, меҳнатни муҳофаза қилиш, техника ва ёнғин хавфсизлиги қоидалари талабларига риоя қилиш.
п) касбий одоб-ахлоқининг умумий принциплари ва хизматдаги хулқ-атворининг асосий қоидаларига амал қилиш.
р) таълим-тарбия ва касб-ҳунарга ўргатиш жараёнига замонавий ва инновацион педагогик услубларни ҳамда ахборот-коммуникация технологияларини кенг жорий этиш орқали таълим ва касб-ҳунар бериш сифатини оширишни мувофиқлаштириб бориш;
с) касбий таълим бериш бўйича ЎИЧМда ўтказиладиган якуний аттестация ҳамда босқичли назорат жараёнида иштирок этиш, ўқувчилар томонидан ўқув дастурларни ўзлаштириш даражасини, ҳудудий таълим бошқарув органлари ва муассасалари ходимларининг малакасини белгиловчи ёзма ва бошқа турдаги назорат ишларини ўтказиш;
т) ЎИЧМ фаолиятини самарали ташкил этиш учун қатъий назорат (ҳисоб)даги ўқув ҳужжатлари (гуруҳ журналлари, давлат намунасидаги ҳужжатларни ҳисобга олиш ва тарқатиш дафтари ва ҳ.к.) намуналарини жойларга етказиш ишларини назорат қилиш;
у) таълим муассасалари томонидан тақдим этилган дарсликларга бўлган талаб-эҳтиёжлар асосида буюртмаларни таҳлил этади ва уларни туман (шаҳар) миқёсида умумлаштириш, вилоят, шаҳар халқ таълим бошқармаларига тақдим этиш;
ф) дарсликлар ва методик қўлланмаларни қабул қилиш бўйича мактаб комиссияларининг янги ўқув йилига дарсликларни қабул қилинишини мувофиқлаштириш, таълим муассасаларига янги ўқув йили учун келтирилган дарсликларни қабул қилиш ҳужжатларини расмийлаштириш ишларини амалга ошириш;
х) Республика таъминоти томонидан берилган дарсликлар қабул қилиб олиш, жойларга етказилиши бўйича ижро ҳужжатларини расмийлаштиш.
117. Билиши лозим:
а) давлатимизнинг халқ таълимига оид ва болалар ҳуқуқларини тартибга солувчи норматив-ҳуқуқий ҳужжатларини;
б) мутахассислиги бўйича янгиликларни, психология-педагогика фани ютуқларини ва уни ҳаётга татбиқ этиш йўлларини;
в) методик ишларни ташкил этиш ва самарадорлигини ошириш усулларини;
г) ўқувчиларнинг, ўз методистлик йўналиши бўйича (қамраб олинган фанлар бўйича) ўқув фанлари бўйича давлат таълим стандартлари талабларини ўзлаштириши мониторингини олиб бориш ва аниқланган камчиликларни бартараф этиш йўлларини;
д) давлат таълим стандартлари, ўқув режа, ўқув дастури ва бошқа ўқув-методик ҳужжатларнинг мазмуни ҳамда ўқув жараёнига татбиқ этиш йўлларини;
е) ўз методистлик йўналиши бўйича (қамраб олинган фанлар бўйича) методик ишларни ташкил этиш ва самарадорлигини ошириш усулларини;
ж) санитария-гигиена талаблари, меҳнатни муҳофаза қилиш, техника ва ёнғин хавфсизлиги қоидаларини.
118. Малака талаблари:
а) ўз йўналиши бўйича фанларнинг бирига тўғри келувчи камида бакалавр даражасидаги олий педагогик маълумот;
б) хорижий тиллардан бирининг бошланғич босқичини ва ахборот-коммуникация технологияларидан фойдаланишни билиши;
в) уч йилдан кам бўлмаган педагогик иш стажи.