Guliston davlat universiteti filologiya fakulteti

Nutqiy sinonimlar – nutqning u yoki bu turiga xoslanishi bilan o’zaro farqlanadigan sinonimlar. Masalan, ozgina, picha, sal, xiyol, jinday, qittay, jichcha qatoridagi ozgina leksemasi nutqning barcha ko’rinishlarida (adabiy nutqda ham, so’zlashuv nutqida ham) qo’llana olgani holda, picha, xiyol, jinday, qittay, jichcha leksemalari faqat so’zlashuv nutqiga xoslangandir.
Kontekstual sinonimiya – til birligi sifatida o’zaro sinonim bo’lmagan leksemalarning ma’lum kontekst doirasida (demak, nutq ichida) sinonimik munosabatga kiritilishi. Masalan, chinni va kosa so’zlarining leksik ma’nolari bir xil emas: chinni «idish-oyoq, izolyatsion materiallar yasash uchun ishlatiladigan oq loy»ni, kosa esa «piyoladan kattaroq idish»ni ataydi. Demak, biri «material»ni, ikkinchisi esa shu materialdan yasalgan «idish»ni anglatadi, shunga ko’ra ular sinonim hisoblanmaydi, ammo ayrim shevalarda chinni leksemasi «kosa» ma’nosida ham qo’llanadi, binobarin, shu shevaga xos kontekst ichida u kosa leksemasining sinonimiga aylanadi. Masalan, Xoljonbika... xitoyi ch i n n i d a moy olib keldi (J.Sh.)
Quyidagi holatlarda leksemalar o’zaro sinonim bo’la olmaydi:
1. Turli turkum leksemalari: ot bilan sifat, sifat bilan fe’l va b.lar.
2. Bir turkum leksemalarida keng tushuncha nomlari bilan tor tushuncha nomlari. Bunday holat ko’proq terminologiyaga xosdir. Masalan, botanikada tur va xil terminlarining tushuncha doirasi teng emas: tur termini urug’dosh bo’lgan bir necha xil va navlarni o’z ichiga olgan takson tushunchasini ifodalaydi, ayni paytda turlar turkumlarga, turkumlar esa oilalarga birlashadi. Shunga ko’ra tur va xil, tur va turkum kabi sinonimik qatorlar bo’lishi mumkin emas.
Nazorat savollari:

1. 
   Sinonimiya nima?
   
2. 
   Sinonimik qator deganda nima tushuniladi?
   
3. 
   Dominanta nima?
   
4. 
   Ma’no sinonimlari haqida gapiring.
   
5. 
   Uslubiy sinonimlar nima?
   
6. 
   Nutqiy sinonimlar haqida ma’lumot bering.