Guliston davlat universiteti filologiya fakulteti

3-amaliy mashg’ulot
Mavzu: So’z birikmasi
Ajratilgan vaqt- 2 soat
Darsning maqsadi: Talabalarning so’z birikmasi to’g’risidagi bilimlarini mustahkamlash, ularda har qanday matndan so’z birikmasini ajrata olish ko’nikmasini hosil qilish.

Ishning bajarilish tartibi:
1. Berilgan mashq, matn va gaplardagi so’z birikmalarini va unga o’xshash hodisalarni ajratib yozing.
2. Ajratilgan so’z birikmalarining tobe va hokim komponentini topib, tobe komponentning tagiga to’lqinli, hokim komponentning tagiga to’g’ri chiziq chizing.
3. Ajratilgan so’z birikmalarini moslashuvli, boshqaruvli, bitishuvli so’z birikmalari tarzida uch guruhga bo’lib qaytadan yozib chiqing.
4. Har bir guruhga oid so’z birikmalarining qismlari qanday vositalar bilan bog’langanini aniqlab, bu vositalarni SBning yoniga yozib chiqing.
6-mashq
Dunyodagi jami mavjudot haroratga talpinib yashaydi. Quyosh kabi muhabbat ham nur manbaidir.
Kunlardan bir kuni mo’’jiza ro’y berdi. Odamlar orasidagi bir kishidan sizga nur tushayotganini tuyasiz. U butun jismu joningizga yoyiladi va umringizda birinchi bora o’zingizni astoydil ko’ra broshlaysiz. Bu muborak nur jami kamu ko’stingizni titkilab, yuzaga olib chiqadi. Qattiq uyat tuyg’usi uyg’onadi. Jon-jahdingiz bilan o’zingizni sozlashga kirishasiz. Birov ko’rmagan ayblaringiz, guvohsiz sodir etgan gunohlaringizni yuvishga tushasiz. Tabiatingiz halim tortadi. Ichu toshingizda yaxshilikka moyillik sodir bo’ladi. haligi nur sizni tinmay ta’qib etaveradi, ichki dunyongizni yoritgandan yoritaveradi. Bora-bora hayotingizda inqilob yuz beradi: odamlar sizda shu kungacha bo’lmagan yangi iqlimni ko’ra boshlaydilar, endi siz atrofga ham yoqa boshlaysiz....
Bu muborak nur MUHABBATdir.
Sizdagi sodir bo’layotgan o’zgarish esa
Poklanishdir! (T.Sodiqova).
7-mashq
Ulug’likka ko’tarilish uchun bir umr riyozat kerak, tubanlikka tushish uchun esa bir on kifoya.
Harom pul ketidan xonadonga notinchlik, bola qoshida beburdlik, el qoshida sharmandalik kirib keladi.
Kishi balandlikka zinalardan o’tib borgani ma’qul. Aks holda, cho’qqiga ko’tarilgan kishining ko’zi tinib, boshi aylanib qolishi mumkin.
Ilm uchun vaqt topolmay, lavozim olish uchun birinchi bo’lib poyga qo’yadigan kishilardan olim chiqmaydi.