Глоссарий жисмоний маданият

Ўз-ўзига гапириш - бажарилиши мўлжалланган ҳаракат амалининг умумий тасвирини яратиш учун қўлланилади. Мазмуни шундан иборатки, ўқувчи амални бажаришдан олдин атайин машқни бажариш техникасини хаёлан бажаради ва хаёлан бажараётган машқнинг элементларини оғзаки ўзига эшиттириб, техниканинг энг муҳим хусусиятларига урғу бериб айтади.

	Идеомотор машқ қилиш - ҳаракат амалларини ҳаёлан бажариш.
	Сўз орқали ўзини бошқариш - ҳаракат амалини бажариш вақтида ички нутқни қўллашга асосланган. Ҳаракатларни ўрганиш давомида ҳаракат фаолиятини бошқариш ўз-ўзига буйруқ бериш, ўзини-ўзи ишонтириш, ўзига-ўзи уқтириш ва ҳ.к. орқали амалга оширилиши мумкин.
	Бир маромда бажариш методи – ушбу метод шуниси билан характерланадики, шуғулланувчи ушбу метод орқали жисмоний машқни узлуксиз, нисбатан доимий шиддат билан бажаради. Хусусан, машқни бажариш давомида ҳаракат тезлигини, иш темпини, ҳаракатлар амплитудасини ўзгаришсиз сақлашга интилади.
	Ўзгарувчан метод – бу метод машқни узлуксиз бажариш давомида, ҳаракатланиш тезлигини, темпини, ритмини мақсадли ўзгартириш орқали юкламаларни изчиллик билан ўзгартиришни кўзда тутади.
	Такрорий метод – бу метод орқали, машқлар кўп маротаба бажарилади, машқлар ўртасида ишчанлик қобилиятининг тўлиқ тикланиши учун етарли бўлган дам олиш интерваллари мавжуд бўлади.