Geosiyosat asoslari

Irqchilik - Odamlar o‘rtasidagi ijtimoiy tengsizlik, bosqinchilik, zo‘ravonlik va urushlarni kishilarning turli irqlariga mansubligi bilan oqlashga xizmat qiluvchi g‘ayrimilliy ta’limot. Irqchilar insonlarning ijtimoiy mohiyatini ularning biologik - irqiy (ko‘zi, sochi va terisining rangi, bosh va yuz tuzilishi kabi tashqi, ikkinchi darajali jismoniy) belgilar bilan bog‘lab, ularni oliy va quyi, bekamu - ko‘st va noraso irqlarga ajratadilar. Unga ko‘ra oliy irqlar xo‘jayinlik qilishi, qolganlari ularga xizmat qilishi, boysunishi shart. Irqchilik ta’limoti boshqa xalqlarga nisbatan bosqinchilik, talonchilik, mustamlakachilik siyosatini asoslashga harakat qiladi.
Islom konferentsiyasi tashkiloti - Afg‘oniston, Chad, Misr, Gvineya, Indoneziya, Eron, Iordaniya, Quveyt, Livan, Liviya, Malayziya, Mali, Mavritaniya, Marokash, Niger, Ummon, Pokiston, Qatar, Saudiya Arabistoni, Senegal, Serra - Leone, Somali, Sudan, Tunis, Turkiya, Yaman davlat vakillari tomonidan tashkil etilgan. IKT ustavidan ko‘zlangan maqsad musulmon davlatlar o‘rtasida birdamlikni kuchaytirish, ular o‘rtasida iqtisodiy, madaniy, ilmiy sohalarda hamkorlikni kuchaytirish, mustamlakachilik va irqchilikning har qanday ko‘rinishlariga barham berish, tinchlik va xavfsizlikni ta’minlashga doir choralar ko‘rish va boshqalar. IKT o‘z faoliyatida tashkilotga a’zo davlatlarning tengligiga, bir - birining ichki ishlariga aralashmaslik, har bir davlatning hududiy yaxlitligi, suverenitetini hurmat qilish, turli kelishmovchiliklarni tinch yo‘l bilan hal etish tamoyillariga amal qiladi. IKT ga Turkmaniston, Tojikiston, Qirg‘iziston (1992), Qozog‘iston (1995). O‘zbekiston (1996) ham a’zo bo‘lib kirishgan. Bugungi kunda 57 ta davlat ning a’zisi hisoblanadi.
Jahon savdo tashkiloti - JST(ingl. World Trade Organization - WTO) —1995 yil 1 yanvarda tashkil etilgan xalqaro tashkilot. Tashkilotga a’zo davlatlar o‘rtasida siyosiy, iqtisodiy - savdoni tartibga solish, xalqaro savdoni liberallshatrish, tashqi savdoga bo‘ladigan har qanday to‘siqlarni bekor qilish maqsadida tashkil etilgan. Tashkilotning shtab - kvartirasi Jenevada joylashgan bo‘lib, 159 ta davlat unga a’zo bo‘lib kirgan. Tashkilot faoliyatining asosiy tamoyillari: tenglik, hamkorlik, oshkoralik.