Fuqarolik xuquqi bilan tartibga solinadigan munosabatlar O‘zbekiston Respublikasi fuqarolik kodeksining 2-moddasida belgilab qo‘yilgan

8. Fuqarolik huquqlarini muhofaza etish va ularni sud orqali himoya qilish prinsipi fuqarolik huquqiy munosabatlar ishtirokchilarining o‘z huquq va manfaatlarini himoya qilishni ta’minlashlari uchun asos bo‘ladi. Fuqarolar o‘zlarining huquq va manfaatlarini muhofaza qilish va buzilgan huquqlarini tiklash maqsadida sudga murojaat qilishlari (FKning 10-moddasi) yohud o‘zlari himoya qilishlari (FKning 13-moddasi), shuningdek, etkazilgan zarar uchun qarshi taraf (kontrogent) ga nisbatan mulkiy tusdagi choralar ko‘rishni talab qilishlari (FKning 14-moddasi) va boshqa shu kabi harakatlarni amalga oshirishlari mumkin. Umuman ushbu prinsipga asoslangan bir qator usullar (FKning 11-moddasi) fuqarolik huquqi predmetining tabiatiga muvofiq aksariyat hollarda mulkiy tusga ega bo‘ladi. Ularni qo‘llashdan nazarda tutilgan provard maqsad ham odatda buzilgan huquqlarni tiklash yoki jabrlanuvchilarga etkazilgan zarar o‘rnini mulkiy qoplashga yo‘naltiriladi.