Fuqarolarning konstitutsiyaviy huquq va erkinliklari

konstitutsiyaviy huquq
Reja:

1. 
   Fuqarolarning konstitutsiyaviy huquq va erkinliklari
   
2. 
   O‘zbekiston Respublikasining Konstitutsiyasi muhim huquq sohalari
   
3. 
   Xalqimiz Konstitutsiyamizni qabul qilinishi orqali dunyo hamjamiyatida
   

Fuqarolarning konstitutsiyaviy huquq va erkinliklari
O‘zbekiston davlat mustaqilligiga erishgan birinchi kunlardanoq o‘z kuchiga, aql-zakovati, milliy an’analar va qadriyatlariga tayangan holda, ayni paytda demokratik erkin dunyo erishgan yutuqlarga hamohang bo‘lib, o‘ziga mos, o‘ziga xos yo‘lni tanladi va bu siyosatni qat’iyatlik bilan olib bormoqda.
O‘zbekiston Respublikasining asosiy Qomusi – Konstitutsiyasi esa mamlakatimizning haqiqiy mustaqil davlat maqomiga ega ekanligiga qonuniy asos soldi, uning tegishli normalarida jamiyatning tuzilishida va davlat qurilishida, fuqarolarning huquq va erkinliklarga erishishida sodir bo‘lgan tub o‘zgarishlar o‘z aksini topdi va mustahkamlandi. Zero, O‘zbekiston Respublikasi Prezidenti Islom Karimov ta’kidlaganidek, “...O‘zbekiston zaminida yashayotgan va mehnat qilayotgan insonlar uchun muhim bir haqiqat tobora aniq va ravshan bo‘lib bormoqda.
Bu haqiqat shundan iboratki, erishgan yutuqlarimizning, bugun kechayotgan tinch va osuda hayotimizning, ertangi kunimizga bo‘lgan ishonchimizning, xalqaro maydonda ortib borayotgan obro‘-e’tiborimizning negizida Konstitutsiyamiz belgilab, muhrlab bergan qonuniy va huquqiy asoslar turgani va ularni og‘ishmay hayotimizga tatbiq etayotganimiz mujassamdir”. Konstitutsiya mamlakatimizda qonunchilik faoliyatini rivojlantirish va bu sohada erkin ijod qilish uchun imkoniyat yaratib berdi. Shu ma’noda O‘zbekiston Respublikasining Konstitutsiyasini ijtimoiy hayotning turli sohalaridagi masalalarni hal qilib beruvchi barcha qonunlarning yuridik manbai, poydevori deyish mumkin.
O‘zbekiston Respublikasining Konstitutsiyasi yuridik fanlarning asosiy manbai va o‘zagi sifatida ham muhim ahamiyat kasb etadi. Aynan Konstitutsiya negizida, aytish mumkinki, uning muayyan normalari orqali ham ma’lum bir huquq tizimlarida uzluksiz ravishda davom etadigan sifat jihatdan tub o‘zgarishlar ro‘y berishi, natijada yangidan-yangi huquq sohalari shakllanishi mumkin. Shuning uchun ham muayyan bir huquq sohasining manbaalarini o‘rganish jarayonida eng avvalo asosiy manba sifatida Konstitutsiyani o‘rganishga alohida e’tibor berib kelinadi.