Ғолиблар қонуни умрингнинг сўнгида қандай яшашни истасанг, шу бугуноқ шундай яшашни бошла

БОШҚА ЖАМИ ИНСОНЛАРНИ КЕЧИРИНГ
Айби ва аҳмоқгарчилигидан қатъий назар, истисносиз ҳаммани кечиринг. Ҳақиқий кечирим гарчи инъомнинг олий кўриниши бўлса-да, биринчи навбатда сизнинг манфаатингизга хизмат қилади. Ахир гап сиз кечираётган одамда эмас, сизнинг устингизда бормоқда. Кечирим сизнинг бахтингиз, муваффақиятингиз ва руҳий осойишталигингиз учун зарур. У сизнинг келажагингиз учун муҳим.
Сизга мутлақо алоқаси йўқ бўлган инсондан жаҳлланишдан баттар аҳмоқгарчилик бўлмаса керак. Чунки сиз ўз ҳаётингизни заҳарлаяпсиз, бояги инсон бундан мутлақо бехабар бўлиши ҳам мумкин.
Ким узоқ вақт хафа бўлиб ва жаҳлланиб юрса ўз кучининг беҳуда сарфланишига сабаб бўлади. Айниқса у ёки бу инсон сизнинг муваффақиятсизлигингизда айбланган ҳолатда бу яққол намоён бўлади. Агар биз айбни кимнингдир зиммасига юкласак, унга ўз ҳаётимиз устидан ҳукмронлик берамиз. Пайдо бўлган вазият учун масъулиятни атрофимиздагиларга юклаб, биз ўз кучимизни беркитамиз ва муваффақиятимизга тўсқинлик қиламиз.
АМАЛДА ФОЙДАЛАНИШ
Аввал инсонни кўнгилда кечириш керак. Сизни хафа ёки ҳақорат қилган инсонга самимий бахт тиланг. Хафалигингиз ёдга тушган заҳоти дарҳол у инсонни дуо қилинг ва бу хотиротлар сизни зумда тарк этади. Сиз шунингдек, у инсонга қўнғироқ қилиб, у билан шахсан суҳбатлашишингиз ҳам мумкин. Бу ҳолатда мулоқотни чегараланг ва унга ўзини оқлашга йўл қўйиб берманг. Шунчаки, уни тамоман кечирганингизни айтинг.
Шунингдек, бўлиб ўтган воқеаларда бутун масъулиятни ўз зиммангизга олганингиз ҳақида унга хат ҳам ёзишингиз мумкин. Эҳтимол, у инсон сизга адолатсиз муносабатда бўлгандир, бироқ бу ҳодисани қандай қабул қилганингиз ва унга қандай муносаатда бўлганингиз сизгагина боғлиқ. Аввало, уни кечирганингиз ва унга жамики яхшиликларни тилашингизни англатинг.
Ғолиблар бериш ва кечириш санъатини пухта ўрганишган. Униси ҳам, буниси ҳам уларнинг руҳи покланишига хизмат қилади ва уларни самимий инсонларга айлантиради. Бериш кўникмаси ҳақиқий фаровонлик, бахт ва осойишталикка эга бўлиш учун замин яратади.