Фармацевтика тизимини бошкаришда бошкарув асослари ва тамойиллари

Фармацевтика тизимини бошқариш фанининг мақсади - фармацевтика соҳасида замонавий ишлаб чиқаришни бошқариш, яъни режалаштириш, тартибга солиш, назорат қилиш, шунингдек ишлаб чиқаришга раҳбарлик қилиш, уни ташкил этиш ва шу каби вазифаларни ўргатишдан иборатдир.
Бошқарувнинг асосий мақсадлари: узоқни кўра билиш, режалаштириш ва бизнеснинг кўзланган натижаларига эриштириш. Менежерларнинг вазифаси мавжуд бўлган моддий ресурслар асосида истеъмолчилар эҳтиёжини ҳисобга олиб товар ишлаб чиқаришни ва хизматлар ташкил қилиш, фармацевтик муассаса ва ташкилотнинг фойдалилигини, ишлаб чиқариш жараёнини оқилона ташкил қилиш орқали бозорда унинг барқарор мавқеини таъминлаш, илмий- техник базасини ривожлантириш, кадрлар салоҳиятидан самарали фойдаланиш ҳисобланади.
Бунинг учун қуйидагилар зарур:

• 
  технологик қайта кўриш ва ишлаб чиқаришни автоматлаштиришни амалга ошириш, юқори малакали фармацевт ходимлардан фойдаланишга ўтиш;
  
• 
  фармацевт ходимлар ишини рағбатлантириш;
  
• 
  фармацевтик муассаса ва ташкилотнинг самарали фаолияти устидан доимий назорат қилиш, барча бўлинмалар ишини мувофиқлаштириш;
  
• 
  янги фармацевтик бозорларни доимий излаш ва ўзлаштириш.
  

Менежерларга фармацевтик муассаса ва ташкилотнинг ривожланиш мақсадларини аниқлаш, устувор вазифаларни, уларни амалга ошириш тартибини белгилаш, фармацевтик муассаса ва ташкилотни ривожлантириш стратегиясини ишлаб чиқиш, қўйилган вазифаларни муддатида бажариш тадбирлари тизимини тайёрлаш, зарур бўлган ресурсларни ва бўшлиқни тўлдириш манбаларини баҳолаш, белгиланган топшириқларни бажариш устидан назоратни кучайтириш ва одамларни самарали бошқариш каби масалаларни ечишга тўғри келади.
Бошқарув учун умумий, махсус, доимий (узлуксиз), даврий мақсадлар
ҳарактерли.
Умумий (стратегик) мақсадлар бутун фармацевтик муассаса ва ташкилотнинг ривожланиш концепциясини акс эттиради.
Махсус мақсадлар эса, умумий мақсадлар чегарасида фармацевтик муассаса ва ташкилотнинг асосий фаолият турлари бўйича тузилади.