|
Doimiy o'zanli oqar suvlar. O'zan bo'ylab doimiy oqimni uzliksiz tarzda harakatlanishi natijasida soylar va daryolar shakllanadi. O'zanning ma'lum darajada nishabligi hamda o'zanga doimiy suv oqib kelishi natijasida doimiy o'zanli oqim hosil bo'ladi. Doimiy oqar suvlarning harakat tezligi relyef qiyaligiga va suv massasiga bog'liq. Daryo o'zanida harakatda bo'lgan suvlar to'g'ri parallel oqmaydi, aksincha doim aylanma (turbulent), ya'ni suv yuzasidan pastga, o'rtadan (suv ostidan) chekkaga (qirg'oqqa) yo'nalgan bo'lib, katta kuchga ega bo'ladi va o'zan osti hamda qirg'oq yonini yemiradi. Oqar suvning bunday ishi natijasida o'zan va qirg'oq eroziyasi shakllanadi. Tog'li hududlarda daryoning oqim tezligi katta va yemirishi kuchlidir. Daryolarning eroziya ishi: a) yuqori oqimida o'zan tagini yemirishdan; b) o'zandagi jinslarni oqizib ketishdan; v) daryo qirg'og'idagi shag'al va qumlarni oqizib ketishdan; d) mayda tosh parchalarini quyi oqimda to'plashdan (akkumulyatsiya) iboratdir. Oqar suvning eroziyasi natijasida tog' jinslari yuvilib, usti ochilib qoladi, ba'zan suv chuqur o'yib jarlar hosil qiladi. Daryoni suvi qancha sersuv va relyefi qiya bo'lsa, yuqori oqimda u shuncha tez oqadi va shuncha ko'p emirish va yuvish ishini bajaradi.
O' zan eroziyasida daryo baland joylardan o'rta oqimi tomon katta tezlikda harakatlanadi, shunda suv o'zan tagini o'yib bu yerda “V” harfiga o'xshash chuqur daralarni hosil qiladi. Ushbu jarayonlarni O'rta Osiyo daryolari — Norin, Terek, Chotqol, Chirchiq, Ohangaron, Sirdaryo, Amudaryoning yuqori oqimida (Vaxsh) yaqqol ko'rish mumkin. Bu daryolar baland Pomir, Tyanshan tog' sistemalaridan boshlanadi, bahor va yozda suv 4—5, hatto 10 barobar ko'payadi, bu vaqtda daryo eroziyasi kuchayib, tik qoyali tor soylar — daralar vujudga keladi. Yemirilgan jinslarni suv bu joydan butunlay olib ketadi va tog' yonbag'irlariga yoki tekislikka keltirib quyi oqimiga to'playdi.
Yonlama eroziya daryoning o'rta oqimida ro'y beradi. Daryo suvi daryo tagini o'ymay, ikki qirg'og'ini yemiradi. Bunday daryolar tekislikda meandralar — eski o'zan qoldig'ini hosil qiladi. Bu hodisa Volga, Ob va Sirdaryoning o'rta va quyi oqimlarida yaqqol ko'rinadi. Meandralar ayrim joylarda katta-kichik ko'llar hosil qiladi va suv toshqini paytda keltirilgan gil, qum so'ng o'simliklar bilan to'lib to'qayzor, torf va tuzli balchiqlar paydo bo'ladi. Bunday joylarda daryo o'zi keltirgan cho'kindining bir qismini qoldirib, o'zanini tez-tez o'zgartirib turadi. Daryolar dengiz va ko'llarga quyiladigan yerlarda eroziya bazisida deltalar hosil qiladi. Bu nom bilan dastlab Nil daryosining dengizga quyilish joyi atalgan. Daryo deltalari har xil kattalikda bo'lib, ba'zilari dengiz tomon har yili 300—400 m, ba'zilari 500—1000 m o'sib boradi. Dengiz oqimi kuchli bo'lgan joylarda delta kichikroq bo'ladi. Amudaryo, Sirdaryo, Volga, Lena va boshqa daryolarning deltalari juda sertarmoqdir. Daryo suvi keltirgan cho'kindi hisobiga hosil bo'lgan delta har yili dengiz maydonini anchagina qismini egallaydi. Masalan, Xuanxe va Yanszi daryolari quyi oqimi, ya'ni deltasini dengizga quyilgan joyida hosil bo'lgan tekislik maydonining uzunligi 1100 km, eni 300—400 km. Huddi shunday maydonni Braxmaputra va Gang daryolari deltasida ham ko'rish mumkin.
Eroziya jarayoni yuqorida aytganimizdek, daryoning geologik ishi natijasida ro'y beradi. Daryoning geologik ishi, avvalo, joyning relyefiga va daryo suvining ko'p yoki kamligiga bog'liqdir. Biroq tektonik harakatlar eroziya jarayonlarining tezlashuvi va sustlashuviga asosiy sababchidir.
Yog'inlar nishab bo'yicha oqib dastlab kichik jo'yak hosil qiladi, keyinchalik yana chuqurlashib, kengayib yuqoriga tomon o'sib boradi-da, bir- biriga qo'shilib, nihoyat, katta daryo vodiysiga aylanadi. Daryo tubi tobora o'yila borib, dengiz yoki ko'l sathi bilan barobarlashadi. Daryoning kelib quyiladigan joyi eroziya bazisi deb ataladi. Eroziya bazisi quruqlikda har xil ko'rinishda uchraydi. O'rta Osiyo daryolari misolida buni yaqqol ko'rish mumkin. Masalan, Chirchiq daryosi Ugom, Piskom daryolari uchun eroziya bazisi rolini o'taydi. Suv bilan oqib kelgan mahsulotlar dastlab hosil bo'lgan o'zan yoki soydan oqib o'tadi. Bu o'zan oqizish kanali deyiladi. Suv oqizib kelayotgan materiallar bilan birga suvning qirg'oqqa urilishi natijasida o'zan kengayadi. Yerning o'z o'qi atrofida aylanishi, relyef tekisligi, tog' jinslarining tarkibi va ularning yotish holati kabi sabablarga ko'ra o'rta oqimda oqizish kanalining shakli ilon izi bo'lib qoladi. Eroziya bazisi ko'tarilsa, eroziya ishi sustlashadi va cho'kindilar to'plana boshlaydi. Agar eroziya bazisi cho'ksa yoki daryoning boshlanish qismi ko'tarilsa, eroziya jarayoni yana boshlanadi. Shunday qilib, eroziya jarayonlari uzoq vaqt davomida bir necha bor takrorlanadi va daryo sohillarida bir qancha terrasalar paydo qiladi. Umuman eroziya bazisining o'zgarishi bilan bo'ylama terrasalardan tashqari, daryo vodiysida bir-biridan ma'lum balandlikda turuvchi ko'ndalang terrasalar (supachalar) ham hosil bo'ladi. Daryoning geologik ishi yer yuzasidagi notekisliklarni yo'qotadi. Eroziya bazisi ko'tarilishidan yoki eroziya bazisi cho'kishidan bir oz to'xtagan davrda daryolar baland tog'larni yemirib, peneplenlarni, ya'ni bir oz yassilangan past-balandliklarni hosil qiladi. Bunday hodisani yer tarixida bir necha bor takrorlanishini eroziya sikli deyiladi. Agar daryo suvi yer qatlamlarini ko'ndalang kesib o'tmay, qatlamning uzunasiga oqsa, bu qatlamlar yoni bo'ylab novlar paydo bo'ladi. Bundan tashqari, tog'dan qarama- qarshi ikki tomonga oquvchi daryoning yuqori qismidagi suv ayirg'ich birinchidaryo eroziya bazisi past va uning qarshisidagi ikkinchi daryoning eroziya bazisi baland bo'lsa, birinchi daryo eroziyani kuchaytirib, ikkinchi daryo tomonga surilib, uning bir qismini qo'shib oladi.
Do'stlaringiz bilan baham: |
