Ҳәзирги күнде энергетика ресурсларынан өнимли пайдаланыўға дүняның барлық мәмлекетлеринде үлкен әҳмиет берилмекте

Энергетикалық ресурс – энергия ғазийнеси.
Энергетикалық технология – энергия ислеп шығарыў, бөлистириў, сақлаў, өзгертиў менен байланыслы болған технология.
Энергия дереклери – тиккелей ямаса өзгертиў нәтийжесинде ямаса қайта ислеў нәтийжесинде пайдалы энергия алыныўы мүмкин болған дереклер.
Энергия утилизациясы – жеткерилген энергиядан пайдалы энергия алыў.
Энергия формасы – бул атама қатты, суйық ҳәм газ тәризли жанылғыларға ҳәм барлық түрдеги энергияларға тийисли: ядро, қуяш, суў, самал, биомасса ҳ.т.б.).
Энергиядан пайдаланыў – пайдалы энергияны ислеп шығарыў ушын зәрүр болған бирлемши ямаса өзгертирилген энергоресурслардан пайдаланыў.
Энергияның өзгертилиўи – атама есабында еки түр мәниске ийе: биринши мәниси – энергияны ислеп шығарыў ямаса өзгертиў процессинде бирлемши энергияның физикалық жағдайы өзгермей қалады (мәселен, өзгермели токты турақлы токқа өзгертиў, көмирден кокс алыў ҳ.т.б.); екинши мәниси – энергия ислеп шығарыў ямаса өзгертиў процесинде бирлемши энергияның физикалық жағдайы өзгереди (мәселен, жыллылық энергиясын электр энергиясына өзгертиў, көмирди газге айландырыў ҳ. т.б.).
Энергия ресурсларды узатыў ҳәм бөлистириўдеги ысыраплар – энергияны узатыў ҳәм бөлистириў менен байланыслы болған энергия ысыраплары (мәселен, электр энергияны узатыўда электр станциядан бөлистириў қурылмалары станцияларына шекем болған узатыў линиялардағы энергия ысыраплары, ҳәмде тиккелей пайдаланыўшыға берилгенге шекем болатуғын энергия ысыраплары).
Энергия ресурслардың жумсалыўы – пайдалы энергия ямаса өзгертирилген энергоресурсларды ислеп шығарыўда энергоресурслардан пайдаланыў.
Өзгертиўдеги ысырап – өзгертиў қурылмасына жеткерилген энергия менен өзгертиў қурылмасынан шығып атырған энергияның парқы.


1.4. Энергия үнемлилигиниң улыўма машқалалары


Жәмиет раўажланыўының объектив нызамлықлары мийнеттиң энергия менен тәмийинлениў дәрежесиниң тынбай өсип барыўын көрсетеди. Бунда техника раўажланыўының көп бағдарлары ислеп шығарыўда энергиядан пайдаланыўдың нәтийжелигин асырыўға, яғный энергия үнемлеўге қаратылған [1 – 15].
Ислеп шығарыўда энергиядан үнемли пайдаланыўды әмелге асырыў, әдетте еки бағдарда алып барылады.