English for everybody

IV ҚИСМ
МЕТОДИК КЎРСАТМА

Мана энди, ҳурматли китобхон, сиз қўлланманинг тўртинчи қисмини ўрганишни бошлаяпсиз. Хўш, ундан қандай фойдаланганда сиз инглиз тилида гапиришни тезроқ ва мукаммалроқ ўрганиб олишингиз мумкин?

Буни билишни истасангиз қуйидаги кўрсатмага амал қилишингиз керак. Шундай қилганингизда сиз берилган мавзулар ҳақида инглиз тилида бемалол суҳбатлаша оладиган бўласиз.

1. 
   Маълум бир мавзуга оид сеансни тинглаганда унинг ёзувдаги ифодасини ҳам кузатиб боринг ва ўзбек тилида берилган сўз ва ибораларни уларнииг инглизча муқобили билан солиштиринг ва пауза вақтида инглиз тилидаги гапларни суҳандоннинг овозига тақлид қилиб қайтаринг. Бу сизга тегишли гапни тўғри талаффуз қилиш кўникмасини тезроқ шакллантиришга ёрдам беради.
   
2. 
   Ушбу сеансдаги гапларни иккинчи марта тинглаганда ҳам айнан шу кўрсатмага амал қилинади.
   
3. 
   Учинчи бор тинглаганда эса, инглизча матнга қарамасдан, ўзбек тилида эшитилган гапдан кейин келадиган пауза вақтида унинг таржимасини ўзингиз айтиб кўринг. Паузадан кейин сиз эшитадиган шу гапнинг муқобили сизга айтган гапингизнинг тўғри ёки нотўғрилигини текшириб кўришингизга ёрдам беради. Агар хато қилиб қўйсангиз ёки бирор сўз ва иборани тушириб қолдирсангиз, ҳечқиси йўқ ташвишланманг, чунки магнит тасмасига ёзилган матн қўлингизда. Сиз уни яхши ўрганиб олгунингизча қайта-қайта эшитишингиз, пауза вақтида эса ўзингиз таржима қилишга ҳаракат қилишингиз мумкин.
   
4. 
   Сеансни 3 марта эшитгандан сўнг ўзбек тилидаги гап­ларни ўқинг-да, уларни ёзма равишда инглиз тилига тар­жима қилишга ҳаракат қилинг.
   

Агар бунда ҳам хатога йўл қўйсангиз ёки бирорта сўзни тушириб қолдирсангиз матнни қайта эшитинг ва берилган гапни инглиз ва ўзбек тилидаги муқобиллари билан солиштириб қилган хатоингизнинг сабабини аниқлашга ҳаракат қилинг. Сўнг яна сеансни бошидан таржима қилинг.
Маълумки, тил ўрганиш машаққатли иш бўлиб, у сабр-тоқат, чидам ва астойдил меҳнат қилишни талаб қилади. Берилган тил материалини қайта-қайта тинглашдан ва таржима қилишдан, нутқий намуналар ёрдамида машқ қилишдан чўчиманг. Сизга ушбу заҳматли ишда сабр-тоқат, чидам тилаб қоламиз.
Омад сизга ёр бўлсин, ҳурматли китобхон!