Ёнfин хавфсизлиги

Ёнғинларга оид ишлар бўйича ўтказиладиган экспериментлар ҳақида тушунчалар / 2; 7/

Гоҳида терговчилар, экспертлар маълум сабаблардан ёнғин келиб чиқиш эҳтимолини аниқлаш мақсадида экспериментлар ўтказишади ва бу орқали тегишли тусмолларнинг асосли эканлигини текшириб кўришади.
Бироқ ёнғин ишлари бўйича ёниш эҳтимолини текшириш учун ўтказилиши зарур бўлган экспериментлар катта таваккалчилик билан боғлиқ бўлиб, уларни ўтказишга ҳамма вақт ҳам рухсат берилавермайди. Кўпинча ёниш учун яратилиши керак бўлган шарт-шароитлар ҳақидаги маълумотлар номаълумлигича қолиб кетаверади. Ёндириш манбаси импульсининг тавсифини ва ҳаво алмашинувининг шароитини аниқ билишнинг иложи йўқ. Агар ёнғин чиқиш эҳтимоли ёнғиндан хавфли суюқликлар билан боғлиқ бўлса, унда бундай тусмолни экспериментал усул билан текшириш учун ҳарорат шароитлари ҳақидаги маълумотлар, ёнғин чиқишига олиб келган алангаланиш пайтида ҳаво таркибидаги хавфли суюқлик парларининг концентрациясини билиш зарур бўлади. Бу эса ўз навбатида ҳисобга олинмайдиган ҳаво ҳаракатининг муҳим жиҳатлари ва бир қатор бошқа кўрсаткичлар билан боғлиқдир.
Ўз-ўзидан алангаланиш орқали ёнғин чиққанлиги тусмолини текшириш учун, масалан, мой сингиган материаллардан, бу материалларга сингиб кетган мойнинг миқдори ва юзаси ҳақидаги маълумотларнинг ўзигина етарли бўлмайди, балки ёнғин чиқишга олиб келган айнан ўша мойнинг алангаланишга мойиллиги ҳақидаги маълумотлар ҳам зарур бўлади. Агар тергов ихтиёрида бу каби маълумотларнинг барчаси мавжуд бўлса, унда мойнинг миқдори билан материал орасидаги муносабат, ёнғин чиққан жойдаги бўлган ҳарорат, иссиқликнинг аккумуляцияланиш шароитлари каби маълумотлар номаълум бўлиб қолади. Бу эса эксперимент ўтказишга имкон бермайди. Агар ўтказилган тақдирда ҳам, унинг натижалари исботловчи аҳамиятга эга бўлмайди ва ёнғин ҳақида хулоса чиқарилаётганда эътиборга олинмаслиги керак.
Стандарт қурилмаларнинг ўрнатилган иш режими жараёнида учқунланишининг характерини аниқлаш, ўзгармас техник характеристикага эга бўлган серияли асбобларда энергия манбасининг маълум параметрлари аниқ бўлган бир пайтда улардаги ҳароратнинг қанчага кўтарилишини аниқлаш мақсадида экспериментларни ўтказиш мақсадга мувофиқдир.