Ёнfин хавфсизлиги

Ёнғин келиб чиқишининг фақат бевосита (техник) сабабини аниқлаш. Ёнғиннинг келиб чиқиши ҳамма вақт ҳам қуйидаги бевосита ёндириш манбасига (техник сабаб) боғлиқдир: электр тармоғидаги қисқа туташув, моддалар ва материалларнинг ўз-ўзидан алангаланиши, турли машиналарнинг трубасидан чиққан учқун, гугурт олови ва шу кабилар. Экспертнинг ваколатига ёнғин келиб чиқишининг фақат ана шу техник сабабларини аниқлаш киради, негаки буни аниқлаш учун махсус ёнғин-техник билим талаб қилинади. Ёнғиннинг келиб чиқиш сабабини юридик жиҳатдан баҳолаш экспертнинг ваколатига кирмайди, шунинг учун ҳам у маълум бир шахснинг айбдорлик даражасини, қасддан ёки эҳтиётсизлик орқасида содир этганини аниқлашга ҳақли эмас.
Ёнғиндаги алоҳида воқеалар билан ҳолатлар орасидаги сабабий боғлиқликларни аниқлаш. Ёнғинлар билан боғлиқ ишларни суриштириш чоғида сабабий боғлиқлик тўғрисидаги масала қуйидаги икки кўринишда юзага келади: шахснинг ҳаракати ёки ҳаракатсизлиги билан унинг ушбу ҳаракати ёки ҳаракатсизлиги оқибатида содир этилган ёнғин орасидаги сабабий боғлиқлик; бири (сабаб сифатида) иккинчисидан (оқибат сифатида) келиб чиқадиган техник кўринишдаги ҳодисалар орасидаги сабабий боғлиқлик объектив қонуният сифатида.
Ёнғин-техник эксперти фақат техник кўринишдаги воқеалар (ҳодисалар) орасидаги иккинчи сабабий боғлиқлик масаласинигина ҳал қилишга ҳақли, масалан ёнғин келиб чиққан жойни ва унинг тарқалиши йўлларини; маълум бир жойдаги ёғоч материалларининг нисбатан кўпроқ куйганлиги сабабини; кўрсатилган шарт-шароитда тадқиқот учун тақдим этилган материалларнинг (ёғоч уни, мой сингиган латта) ўз-ўзидан алангаланиш эҳтимолини; маълум бир предметларнинг труба ёки тутун мўрисидан чиққан учқун таъсири остида ёки машиналарнинг қизиб турган қисмларига тегиб туриши натижасида алангаланиши эҳтимоли ва шу кабилар.
Агар ёнғин-техник эксперти махсус олий маълумотга эга бўлса, унда у электр токининг, ёниш кимёсининг, оксидланиш назариясининг, ўз-ўзидан алангаланишнинг, қурилиш ишларининг ва шу кабиларнинг ёнғин хавфига оид масалаларни ҳам ҳал қилишга ҳақи бор.