|
Ёнғин-техник экспертизаси томонидан ҳал қилинадиган масалаларнинг тахминий рўйхати. Экспертиза ўтказишнинг техник тартиби / 2; 6; 7; 8/
Экспертиза ўтказиш чоғида эксперт томонидан ҳал қилиниши зарур бўлган масалаларнинг тахминий рўйхатини келтиринг. Экспертиза ўтказишнинг техник тартибини айтиб ўтинг.
Ёнғин-техник экспертизасини тайинлашда эксперт олдига қўйиладиган саволларнинг тўғри тузилганлиги жуда катта аҳамиятга эгадир. Бу саволлар махсус атамалардан тўғри фойдаланган ҳолда тузилган бўлиши зарур. Шунинг учун ҳам терговчи бу саволлар рўйхатини тузишдан олдин тегишли соҳадаги мутахассислар маслаҳатидан фойдаланса фойдадан холи бўлмайди (жумладан экспертизани ўтказиши мўлжалланаётган шахс), бу эса амалдаги қонунлар талабларига зид келмайди.
Эксперт олдига қўйиладиган саволлар унинг ваколати доирасидан четга чиқмаслиги ҳамда аниқ, лўнда ва тушунарли бўлиши керак.
Экспертиза тезроқ ўтиши учун қўйилган саволларнинг кетма-кетлигини тўғри танлаш ҳам катта аҳамиятга эга.
Энг аввал ёнғин ўчоғини ва унинг содир этилган вақтини, шунингдек тарқалиши йўналишларини аниқлашга оид саволлар қўйилади, масалан:
ёнғин қаерда ва қачон пайдо бўлди ва қайси йўллар бўйлаб тарқалди;
ёнғин қандай қилиб тарқалди (пастдан юқорига қараб, юқоридан пастга, горизонтал йўналишда, қиялаб ва шу кабилар);
конструктив элементлари ёки бошқа ёнувчан материалларнинг маълум бир жойдаги жуда кескин ёниб кетганлиги қандай тушунтирилади;
энг аввал нима ёнишни бошлаган ва шу кабилар.
Ундан кейин содир этилган ёнғиннинг ҳолатларини аниқлаш учун зарур бўладиган техник маълумотларга оид саволлар қўйилади:
маълум модданинг ўз-ўзидан алангаланиш ҳарорати қанча;
агар олов (аланга)нинг ранги қанақадир тусга эга бўлган бўлса, унда айнан қайси материаллар ёки моддалар ёнган;
қайсидир аниқ бир материал ёнганида унинг максимал ҳарорати қанчани ташкил қилади;
қайсидир предметларнинг бир-бирига ўзаро текканида (ишқаланганлигида, урилганида) учқун пайдо бўладими, агар шундай бўлса, унда у ёнғин келиб чиқишига сабаб бўла оладими;
маълум бир материал ёки модда бошқа маълум бир ёндириш манбаси таъсиридан ёна оладими;
маълум бир ёнувчан материаллар ёки предметлар маълум бир шароитда ўз-ўзидан алангаланиб кетиши мумкинми (масалан, пар билан иситиш тизими қувурининг ҳарорат остида);
ёнғин содир этилишидан олдинги ҳолат шароитида маълум бир модда ёки материал ўз-ўзидан алангаланиши мумкинмиди ва шу кабилар.
Ундан кейин ёнғин хавфсизлиги қоидаларини қўпол бузганлик билан боғлиқ бўлган далилларни аниқлашга оид саволлар қўйилади, масалан:
ёритиш ёки кучланиш электр ускуналарининг, иситиш асбобларининг ёки шамоллатиш тизимининг электр ўтказгичларини ўрнатиш (монтаж қилиш) чоғида техник шартлар талаблари бузилганми; агар бузилган бўлса, унда улар қайсилар. Аниқланган бузилишлар (камчиликлар) нинг ёнғин келиб чиқишига ёки унинг тарқалишига бевосита алоқаси борми;
қайсидир маълум бир ишни бажаришда (масалан, газ пайвандлаш чоғида) ёнғин хавфсизлиги қоидаларининг барча талабларига риоя қилинганми; агар йўқ бўлса, унда улар айнан қайсилар;
маълум бир ҳолатда (шароитда) маълум бир шахснинг ҳатти-ҳаракатлари тегишли техник ҳужжатлари талабларига мос келганми (масалан, йўриқномалар, қоидалар талабларига) ва шу кабилар.
Ундан кейин ёнғиннинг бевосита (техник) сабабини аниқлашга қаратилган саволлар қўйилади, масалан:
ёнғиннинг келиб чиқишига бевосита нима (техник) сабаб бўлди;
аниқланган ёнғин ўчоғида жойлашган материаллар ва моддаларнинг ўз-ўзидан алангаланиши натижасида ёнғин содир этилмаганми;
ёнғин электр тармоғида рўй берган қисқа туташув, ортиқча юкланиш, катта ўтувчан қаршилик натижасида содир этилмаганми;
ёнғин содир этилган портлаш натижасида рўй бердими ёки портлаш ёнғин натижасида содир этилдими ва шу кабилар.
Энг охирги навбатда ёнғинга қарши техник воситаларининг техник ҳолатига оид саволлар қўйилади, масалан:
ушбу ёнғинда ёнғинга қарши автоматик восита қайси сабабдан ишлаб кетди (хабарловчилар, спринклер ёки дренчер ускуналари);
ушбу ёнғинни ўчиришда ёнғинга қарши техникани ишлатишда улардан тўғри фойдаланилганми ва шу кабилар.
Do'stlaringiz bilan baham: |
