Ёнfин хавфсизлиги

Ёнғин-техник экспертизасини тайинлаш тўғрисидаги Қарор қуйидаги қисмлардан иборат:

• 
  кириш қисми;
  
• 
  баён қилиш (ёзма) қисми;
  
• 
  резолютив қисми.
  

Кириш қисмида қуйидагилар кўрсатилади:

• 
  қарор тузилган кун, ой, йил ва жой (аҳоли пункти);
  
• 
  қарорни ким тузганлиги (мансаби, махсус унвони, фамилияси);
  
• 
  қайси жиноят ёки фуқаролик иши бўйича.
  

Баён қилиш (ёзма) қисмида қисқача қилиб ишнинг моҳияти кўрсатиб ўтилади, шунингдек экспертиза тайинланиши шартлигини кўрсатувчи асослар ва қонуннинг қайси нормаларига асосланиб тайинланаётганлиги.
Резолютив қисмида эса қуйидагилар кўрсатилади:

• 
  қайси сабабдан экспертиза тайинланиши ҳақида қарор қабул қилинганлиги, нимани тадқиқ қилиниши ва экспертиза тури (ёнғин-техник, криминалистик, бухгалтерлик ва ш.к.) ҳамда унинг процессуал кўриниши (бирламчи, қайта, якка тартибда, комиссиявий, комплекс);
  
• 
  экспертиза ўтказилиши топшириладиган экспертнинг фамилияси ёки эксперт муассасасининг номи;
  
• 
  эксперт (экспертлар) ёзма равишда Хулоса бериши керак бўлган саволлар рўйхати;
  
• 
  тадқиқот учун юборилаётган материаллар рўйхати.
  

53. 
    Ёнғин-техник экспертининг ваколатлари / 2; 6; 8/
    

Ўзбекистон Республикаси Жиноят-процессуал Кодексининг 68-моддасига асосан эксперт ўзи ўтказаётган тадқиқот ишларида ва чиқараётган хулосасида ўз илмий доираси ваколатидан ташқарига чиқмаслиги керак.
Экспертнинг ўз ваколати доирасидан четга чиқиш ҳолатлари амалиётда қуйидагиларда кузатилади:
а) қилмиш таркибида жиноий ҳаракатларнинг ёки унинг субъектив томонларининг бор-йўқлигини ҳал қилади.
б) тадқиқ қилиш учун мустақил равишда керакли исботловчи материалларни йиғишга (тўплашга) киришади (унга тақдим қилинган материаллардан ташқари).
Эксперт тадқиқотини янги материаллар билан тўлдириш зарурати туғилган барча ҳолатларда эксперт хат орқали экспертиза тайинлаган органга мурожаат қилишга мажбурдир. Эксперт ўз аризасини хат орқали экспертиза тайинлаш қарори унга тақдим қилинган пайтда ёки эксперт тадқиқотини ўтказиш чоғида ҳам бериши мумкин. Бу ариза оғзаки (унда бу ариза баённомага киритилиши лозим) ёки ёзма равишда қилинади. Бу аризада эксперт қўшимча тадқиқот ўтказиш учун унга айнан қайси материаллар зарурлигини кўрсатиб ўтиши керак;
в) экспертиза учун тақдим қилинган материалларда ўз хоҳишига кўра фақат айримларини ажратиб олади, қолганларини эса эътиборсиз қолдиради, яъни ўзи ўзига исботловчи органнинг ваколатларини олади.
Бундай ҳолатларнинг олдини олиш мақсадида терговчи экспертиза тайинлангунга қадар иш материалларида эксперт хулосаси лозим бўлган қарама-қаршиликларни бартараф этиш учун барча чораларни кўриши лозим. Агар бунинг уддасидан чиқишнинг имкони бўлмаса, унда экспертиза тайинлаш қарорида ишнинг айнан қайси материаллари тадқиқ қилиш учун тақдим қилинаётганлиги айтиб ўтилади.