Экология ҳуқуқи предмети, методи ва тизими

5-масала
Чет эл инвестициялари иштирокидаги “BLACK GOLD” қўшма корхонаси, Ўзбекистон Республикасида, ер ости бойликларини қазиб олиш ва уларга нисбатан мулк ҳуқуқини киритиш тўғрисида рухсатнома олиш мақсадида Ўзбекистон Республикаси Вазирлар Маҳкамасига мурожаат қилган.
Лекин, Ўзбекистон Республикаси Вазирлар Маҳкамаси чет эл инвестициялари иштирокидаги “BLACK GOLD” қўшма корхонасига рад жавобини берган.
– Амалдаги қонунчиликка асосан Ўзбекистон Республикаси Вазирлар Маҳкамасининг рад жавоби қонунийми?
– Чет эл инвестициялари иштирокидаги “BLACK GOLD” қўшма корхонасига мазкур ҳолатда қандай ҳуқуқий маслаҳат берасиз?
6-масала
Тошкентда “Семашко” номли шифохона ҳудудида ҳаммом ва ер участкаси мулкдори фуқаро М. 30 метр чуқурликда шифобахш минерал сув олиш ва реализация қилишни йўлга қўяди.
Табиатни муҳофаза қилиш давлат инспекторининг сувдан фойдаланишга рухсати борми деб текширишга келади. Фуқаро М. инспекторга “менга ҳеч қандай рухсат керак эмас, чунки ушбу ер участкаси менга мулк ҳуқуқи асосида тегишли” деб маълум қилади ва унда мазкур ер участкасига Давлат ордери борлигини айтди.
– Ушбу ҳолатда 30 метр чуқурликдаги минерал сувга нисбатан мулк ҳуқуқи кимга тегишли?
– Давлат инспектори қандай хатти-ҳаракатларни амалга ошириши лозим?
– Назорат органларининг ваколатлари қайси норматив-ҳуқуқий ҳужжатларда ўз аксини топган?


7-масала
Туман халқ депутатлари кенгаши томонидан мазкур туман ҳудудида жойлашган кимё заводи томонидан атмосферадан саноат мақсадларида фойдаланишни чеклаш тўғрисида қарор қабул қилинди.
– Туман халқ депутатлари кенгаши бундай қарор қабул қилишга ҳақлими?
– Атмосфера ҳавосидан саноат мақсадларида фойдаланиш масаласи қонунчиликда қандай тартибга солинган?


8-масала
Туман ҳокимияти ходимларидан бири Конституциянинг 55-моддасидан келиб чиқиб, унинг ҳудудидаги ҳеч бир ер участкаси хусусий мулк бўлиши мумкин эмаслигини таъкидлади.
– Ушбу масала амалдаги қонунчиликка биноан қандай ҳал этилади?