Э. ҚОсимов, М. Aкбaров пaрдозбоп қурилиш aшёлaри

Кўп тешикли ғишт. Бундай ғиштлар учун хомашё сифатида тупроқ ёки трепел тоғ жинсли тупроқ ишлатилади. Кўп тешикли ғиштлар ҳар хил шаклда чиқарилади. Кўпинча тўғри бурчакли параллелепипед шаклидаги, қалинлиги бўйлаб кўп тешикли (31 тадан 105 тагача) деворбоп ғиштлар чиқарилади. Ишлаб чиқа­ришда кўп тешикли ғиштлар нам ва ним қуруқ усулда қолипланади. Томонларининг ўлчами оддий ғиштга нисбатан катта бўлади. 4.5-расмда томонларининг ўлчами 25012065, 25012088 ва 250120103 мм га тенг бўлган нам усулда қолипланган кўп тешикли ғиштлар кўрсатилган.
Кўп тешикли ғишт­ларнинг зичлиги 1200—1300 кг/м³, сув шимув­чанлиги эса масса бўйича 18% дан ошмайди.
Нам усулда қолиплан­ган кўп тешикли ғишт­лар сиқилишдаги мустаҳ­камлик чегараси бўйича 4 та маркага бўлинади: 75, 100, 125 ва 150.
Ғишт юзасидаги чуқурча томонлари беш бурчак қилиб ишланган ғиштлар одатда ним қуруқ усулда қолипланади. Беш томонли чуқурчалардан иборат бўлган ғиштдан терилган деворда вертикал узун тешиклар бўлмайди. Кўп тешикли ғиштларни 15°C да 15 марта музлатиб эритилганда бузилмаслиги керак.
Енгил вазнли қурилиш ғишти. Бундай ғиштлар ёнувчан қўшилмалар аралаштириб қолипланади. Ёнувчан қўшилмалар сифатида ёғоч қириндиси туйилган тошкўмир майдаси ва туйилган торф ишлатилади. Юқори ҳароратда лойдаги ёнувчан қўшилмалар (майдаланган ғўзапоя) ёниб, ўрнида ғоваклар ҳосил бўлади ва ғишт вазни енгиллашади. Ҳажмий массаси бўйича енгил вазнли ғишт A, Б ва В каби уч синфга бўлинади, яъни синф A-700 дан 1000 кг/м³ гача , Б-1000 дан 1300 кг/м³ гача, В-1300 дан 1450 кг/м³ гача. Сиқилишдаги мустаҳкамлиги бўйича A синфи — 75, 50, 35, Б синфи — 75, 50 ва В синфдаги ғиштлар эса 100, 75, 50 маркаларга бўлинади.
Қурилишларда кўп тешикли ёки енгил вазнли ғиштларни ишлатиш натижасида ишлаб чиқариш ва ғиштни ташишга сарф­ланадиган харажатлар камаяди. Шу билан бирга бундай ғиштлардан терилган девор енгил бўлади ва ўзидан иссиқлик кам ўтказади, ҳамда зилзила худудлари учун мақсадга мувофиқдир.