Э. ҚОсимов, М. Aкбaров пaрдозбоп қурилиш aшёлaри

Ўсимлик елимлари икки хил бўлади: декстрин ва ун чанги. Декстрин крахмални қайта ишлаб олинади, ун чанги эса дон янчиш саноатининг чиқиндисидан олинади. Ишлатиш учун қулай бўёқ таркиби олиш учун 45 г қуруқ декстрин, 1 кг бўр кифоя қилади. Ўсимлик елимлари грунтлаш, шпаклёвкалаш ва бўёқ таркибларини тайёрлашда, боғловчи модда сифатида, шунингдек, гулқоғозларни деворга ёпиштиришда ишлатилади.
Сунъий елим — сунъий смолаларнинг сувдаги эритмаси, яъни карбоксилметил селлулозалари билан метилселлулозаларнинг сувдаги эритмасидир. Сарғиш рангли ёғоч селлулозани кимёвий йўл билан қайта ишлашдан ҳосил бўлган маҳсулот — карбоксилметил селлулоза чиришга чидамли, шишиш хусусиятига эга бўлган сувда эрувчан смоладир. У елимли ва мойли бўёқлар тайёрлашда ишлатилади.
Полимер елимлар ёпишувчанлиги жуда юқори бўлган синтетик полимер моддалардан иборат. Бундай елимлар сувли ёки спиртли эритмалар асосида тайёрланадиган эмулсиялар сифатида ишлатилади. Масалан, НПВA елими сув ва спирт эритмаси асосида тайёрланади. У парда ашёларни, гулқоғозларни, дарз кетган ёки шикастланган темир-бетон конструкцияларни (НПВA цемент елими) ёпиш­тиришда ишлатилади.
Суюлтирувчи ашёлар. Қуюқ бўёқ таркибларни суюлтиришда ёки минерал пигментлар асосида бўёқлар тайёрлашда суюл­тирувчи ашёлар кўп ишлатилади. Суюлтирувчининг эритувчидан фарқи шундаки, суюлтирувчига парда ҳосил қилувчи модда қўшилган бўлади. Бу эса бўёқ таркибларининг сифатини анчагина яхшилайди. Суюлтирувчи эмулсиялар грунтовкалар тайёрлашда ва қуюқ мой бўёқларни суюлтиришда ишлатилади.
Масалан, рух ва литропон белиласи ҳамда рангли қуюқ бўёқ­лардан темир суриги, мўмиё ва охраларни суюлтиришда эмулсиялар кўп ишлатилади. Қандай бўёқ бўлишидан қатъи назар, унга қўшиладиган суюлтирувчи миқдори 22—40% дан ошмаслиги лозим.
Эритувчилар. Барча бўтқасимон бўёқ таркибларни ишлаш учун қулай даражага келтиришда эритувчилар катта аҳамиятга эга.
Эритувчилар ишлатилишига кўра 3 хил бўлади: мойли лак ва бўёқлар учун; глифтал ва битум лак бўёқлари учун; эпоксид, нитроселлулоза ва перхлорвинил лак-бўёқлари учун ишлатиладиган эритувчилар.
Елимли сув-эмулсияли бўёқлар учун эритувчи сифатида сув ишлатилади. Лак-бўёқларни эритишда кўпроқ скипидар, солвент­нафт, уайт-спирт ва бошқалардан фойдаланилади.
Сиккативлар («сикко» — қуритиш демакдир). Қурилишда энг кўп ишлатиладиган сиккатив рухли марганес сиккативидир. У нафтанат кислотасида эритилган рухли марганес тузидан олинади. Сиккативлар, асосан мойли ва синтетик лак-бўёқларнинг қуришини тезлатиш учун қўшиладиган суюқликдир. Бўёқ пардани тез қуритиш керак бўлса, унга 5-8%, лак учун эса 10% гача сиккатив қўшиш тавсия этилади.


Пигментлар

Кимёвий бирикмалар билан бўялган, сувда ва бирикти­рувчиларда, шунингдек, органик эритмаларда эримайдиган ҳамда кукун ҳолатида суюқ боғловчилар билан осонгина аралашиб бўёқ ҳосил қиладиган моддалар пигментлар деб аталади. Пигментлар органик ва минерал бўлади. Минерал пигментлар ўз навбатида табиий ҳамда сунъий хилларга бўлинади (11.1-жадвал).

11.1-жадвал