Е. Б. Бабский, А. А. Зубков, Г. И. Косицкий, Б. И. Ходоров

Нафас марказига карбонат кислотанинг бевосита (тўғридан-тўгри) таъсири. Карбонат кислота нафас марказига бевосита қўзғатувчи таъсир кўрсатиши турли экспериментларда исбот этилган. Таркибида карбонат кислота ёки унинг тузи бўлган 0,01 мл эритма узунчоқ миянинг маълум қисмига юборилса, нафас ҳаракатлари кучаяди. Эйлер мушукнинг ажратилган узунчоқ миясига карбонат ангидридни таъсир эттириб, электр разрядлари (ҳаракат потенциаллари) частотасининг кучайганини кузатган, бу эса нафас марказининг қўзғалганлигидан гувоҳлик беради.
Марказда тез импульс разрядлари пайдо бўлишидан олдин мембрана потенциали аста-секин ўзаради, бу ўзгариш рецепторларда кузатиладиган генератор потенциалини эслатади. Бунга нафас марказининг генератор нейронлари карбонат кислота таъсирига сезгир эканлигидан ва периферик хеморецепторлар баъзи химиявий моддалар таъсирига қандай реакция кўрсатса, бу нейронлар карбонат кислота таъсирига ўшандай реакция кўрсатишидан дарак беради деб қараш мумкин.
Нафас марказига водород ионлари юқори концентрациясининг таъсири. Винтерштейн фикрича, карбонат кислотанинг ўзи эмас, балки марказ ҳужайраларида карбонат кислота кўпайиши сабабли водород ионлари концентрациясининг ортиши нафас марказини қўзғатади. Мияни кон билан таъминловчи артерияларга карбонат кислотадан бошқа кислоталар, масалан, сут кислотаси юборилганда ҳам нафас ҳаракатларининг кучайиши бу фикрга асос бўлади. Қон ва тўқималардаги водород ионлари концентрацияси ортганда рўй берувчи гипервентиляция қондаги карбонат кислотадан бир қисмининг организмдан чиқиб кетишига ёрдам беради ва шу билан водород ионларининг концентрациясини камайтиради. Бу экспериментларга қараганда, нафас маркази қондаги карбонат кислотанинг парциал таранглигини доим бир даражада тутувчи регулятор бўлиш билангина қолмай, водород ионлари концентрациясини ҳам доим бир даражада сақловчи регулятордир.
Винтерштсйн аниқлаган фактлар бир қанча экспериментал текширишларда тасдиқланди. Бироқ нафас марказининг қўзғалишида карбонат кислотанинг специфик ролини инкор қилиш нотўғри бўлиб чиқди. Экспериментларда кўрсатилишича, водород ионларининг концентрацияси бир хил бўлганда карбонат кислота нафас марказини бошқа кислоталарга қараганда кучлироқ қўзгатади. Аксари тадқиқотчилар шунга асосланиб, нафас марказига Н2СО3 нинг специфик таъсир кўрсатишини эътироф этишади.