Dts talablari asosida o‘quvchilar

O‘ZBEKISTON RESPUBLIKASI XALQ TA’LIMI

VAZIRLIGI
RESPUBLIKA TA’LIM MARKAZI

INFORMATIKA FANIDAN DAVLAT TA’LIM

STANDARTI VA O‘QUV DASTURI, MAVZUIY REJALASHTIRISH HAMDA HAR BIR DARSDA O‘RGANILADIGAN BKM HAJMI VA

MAJBURIY STANDART NAZORAT ISHLARINI O‘TKAZISH BO‘YICHA TAVSIYALAR

(5-6-7-sinf)

TOSHKENT 2009

B.Boltayev	Respublika ta’lim markazi, ta’lim jarayonini axborotlashtirish bo‘limi boshlig‘i, fizika – matematika fanlari nomzodi
M.Mahkamov	Respublika ta’lim markazi, ta’lim jarayonini axborotlashtirish bo‘limi bo‘limi boshlig‘i o‘rinbosari
A.Azamatov	Toshkent shahar 274-maktab, informatika fani o‘qituvchisi, fizika – matematika fanlari nomzodi, Xalq ta’limi a’lochisi

DAVLAT TA’LIM STANDARTIGA SHARH

1. 
   Informatika ta’limining maqsad va vazifalari
   

«Kadrlar tayyorlash milliy dasturi»da kadrlar tayyorlash tizimi va mazmunini mamlakatning ijtimoiy va iqtisodiy taraqqiyoti istiqbollaridan, jamiyat ehtiyojlaridan, fan, madaniyat, texnika va texnologiyalarning zamonaviy yutuqlaridan kelib chiqqan holda qayta qurish nazarda tutiladi, deb ta’kidlangan.

Yangi ta’lim tizimiga o’tilayotgan hozirgi davrda har bir fanning o’qitish mazmunini qayta tahlildan o’tkazish va bunda tubdan isloh qilish nuqtai-nazaridan yondashuv zarur bo’ladi. Natijada kompyuter savodining tayanch tabaqasi o’z vaqtida amalga oshadi va boshqa fanlarni o’rganish sohasida ham muayyan yutuqlarga erishish mumkin bo’ladi.

Umumiy o’rta ta’limda «Informatika» kursining maqsadi - o’quvchilarga axborotlarni qayta ishlash texnologiyalari va ulardan foydalanish jarayonlari haqida puxta va ongli ravishda o’zlashtirish uchun bilim asoslari berishni ta’minlashdan, ularga o’quv va keyingi ish faoliyatlarida kompyuterlardan oqilona foydalanish ko’nikma va malakalarini berishdan, shular asosida yangi axborot texnologiyalarining mamlakatimiz taraqqiyotiga qo’shadigan xissasi to’g’risida tasavvur hosil qilishdan iborat.

Umumiy o’rta ta’lim maktablarida Informatika ta’limining asosiy vazifalari:

• 
  axborotlarni qayta ishlash haqida ilmiy dunyoqarash asoslarini shakllantirish;
  
• 
  zamonaviy kompyuter texnikasinining tuzilishi, tarkibi, ishlashi va qo’llash imkoniyatlari bilan tanishtirish;
  
• 
  kompyuterlar bilan amaliy ishlash ko’nikma va malakalarini shakllantirish;
  
• 
  axborot texnologiyalari haqida bilimlar berish hamda ular bilan ishlash ko’nikma va malakalarini shakllantirish;
  
• 
  kompyuterda masalalalar yechish texnologiyalari bilan tanishtirish, uning asosiy bosqichlari haqida tasavvur hosil qilish va ko’nikmalarni shakllantirish;
  
• 
  asosiy algoritmik tuzilmalarni bilish, algoritmlash va dasturlash asoslari bo’yicha ko’nikmalarni shakllantirish;
  
• 
  kompyuterning dastur ta’minoti tarkibi, vazifalarini va ularni o’rnida qo’llash imkoniyatlarini aniqlay bilish;
  
• 
  kurs davomida olingan bilim va ko’nikmalardan tipik o’quv masalalarini yechishda foydalanishga o’rgatish;
  
• 
  yangi axborot texnologiyalarining jamiyatimizning ijtimoiy va iqtisodiy taraqqiyotidagi muhim ahamiyati va inson faoliyatining turli jabhalariga ijobiy ta’siri haqida tasavvur hosil qilish.
  

Umumiy o’rta ta’lim maktabi informatika ta’limi oldiga qo’yilgan vazifalarning bajarilishini ta’minlash va nazorat qilish ushbu Davlat ta’lim standarti orqali amalga oshiriladi. U umumiy o’rta ta’lim maktabida beriladigan informatika va hisoblash texnikasi asoslari ta’limi mazmunining majburiy minimumi hamda o’quvchilarning informatikadan tayyorgarlik darajasiga qo’yiladigan minimal talablar majmuasini ifodalaydi.

Informatika ta’limi majburiy minimumi umumiy o’rta ta’lim maktablarida o’quvchilarga informatikadan berilishi zarur bo’lgan ta’lim mazmunining minimumini ifodalaydi.

Informatika ta’limining tayanch qismi mazmuni axborot, kompyuter, axborot texnologiyalari, kompyuterda masalalar yechish texnologiyalari, axborot texnologiyalarining istiqbollari bo’limlaridan iborat.