Diplomsiz ziyoli

Berdieva Ro’zixol
(1963-2018)
Ro’zixol Termiz shahrida tug’ildi. O’rta maktabni tamomlagach, Denov tumanida yashovchi hamqishlog’imizga turmushga chiqib o’sha yerda yashadi. Uy bekasi sifatida solih farzandlarni dunyoga keltirib tarbiyalab voyaga yetkazdi.
O’zining xushmuomalaligi, mehnatkashligi, oilaparvarligi bois odamlar hurmatiga sazovor bo’ldi. U turmush o’rtog’i Azizov Shodiqul bilan Muhabbat, Munojot, Jasur, Sitora, Go’zal, Ja’far ismli farzandlarni voyaga yetkazdi.


NEMISCHA HISOB-KITOB
Boboev Bobomurod
(1963-20012)
Muzrabot tumanida tug’ilgan bu hamqishlog’imiz bir umr payvandchilik kasbini ardoqlab yashadi. Odamlar buyurgan ishini o’z vaqtida bajarishga harakat qildi. U nemischa hisob-kitobga o’rgangan edi. Birovning bir tiyinini ham, bir soniyasini ham o’g’irlamasdi. Uning hayotiy falsafasi shu edi. Bobomurod korxona, tashkilotlarda shartnoma bilan ishlar edi. Afsuski, uning oilasi, farzandlari haqida ma’lumot ololmadik.
“G’AZALNI SEVGAN QIZ…”
Jo’raeva Zuhra
(1963-2020)
Sen kulib turibsan, har qanday shoir
Ko’zlaring o’tida erib ketadi.
Hofizi Sheroziy tirilib hozir
xolingga dunyoni berib ketadi…
(Erkin Vohidov)
Darband qishlog’ida shunday insonlar o’tganki, ular o’zlarining yaxshi amallaridan tashqari solih farzandlar ham qoldirgan. Ana shunday insonlardan biri Juma Jo’raev edi. Xalqparvar, alolatparvar hamqishlog’imiz uzoq yillar Darband xo’jaligida turli lavozimlarda ishlab yashab o’tdilar.
Uning qizi Zuhraxon bilan bir maktabda tahsil oldik. Zuhra maktab davridayoq o’zining bilimdonligni, zukkoligni namoyon etdi. U adabiyotni jon-dilidan sevardi. Maktabni a’lo baholar bilan tugatdi. Shundan so’ng hamqishlog’imiz Tog’aev Sayfiddinga turmushga chiqib Muzrabot tumanining Yangiobod massivida yashay boshlaydi.
1984 yildan boshlab Yangiobod massividagi Navbahor bolalar bog’chasida ishlay boshlaydi. 1994 yildan 2000 yilgacha 12 maktabda kutubxonachi vazifasida ishladi. Z.Jo’raeva 4 nafar farzandni voyaga yetkazib ularning oila qurishlari oliy ma’lumot bo’lishlariga astoydil harakat qildi. U 2020 yilda vafot etdi.
Undan Muhiddin, Obiddin, Feruz, Mohida ismli farzandlar qoldi.