|
QARAQALPAQSTANÍM MENIŃ
Táriyp
Jan degeniń sonsha shiyrin,
Heshkim jannan keshe almas.
Jan ishire jan Watanım,
Heshkim jannan úze almas.
Úzse hámki bir kún kelip,
Pushayman jer tóze almas.
Kózdiń aǵı qarasınan,
Bezse sóner, beze almas.
Qaraqalpaqstanım meniń,
Anamnıń da anasınan,
Babalardıń babasınan,
Adamata, Nuwx payǵambar,
Tumarisa sazasınan.
Edige hám Alpamıslar,
Gúlayımnıń kaabasısań...
Basımdaǵı altın tajım,
Kewlimniń qalasısań.
Beyishim, bostanım meniń,
Qaraqalpaqstanım meniń.
Sen ázelgi ata xalıqsań,
Ullılıqta bilimiń kóp.
228
Túrkiylerge altın taxtsań,
Ulıs, beglik qurıwıń kóp.
Barlıq qáwim saǵa salǵan,
Eski úyseń sınıǵıń kóp.
Tumlı-tusqa shashıraǵan,
Toqsan eki burımıń kóp.
Ullı Táńrim alǵıslasa,
Bul dúnyada turıwıń kóp.
Teberik Watanım meniń,
Qaraqalpaqstanım meniń.
Túrkstan hám Turan saǵan,
Massagetten qalǵan mákan.
Altın Orda, Deshti qıpshaq,
Keń órisiń qatar qonǵan.
Mıń reńge juwdı seniń,
Júzlerińdi mıń bir zaman.
Mıń apatlı joldan ótip,
Bul kúnlerge keldiń aman.
Baxıtım, iymanım meniń,
Qaraqalpaqstanım meniń.
Batırlıqta dańqı ketken,
Ernazarday kimler ótken.
Qaraqalpaqqa xanlıq berip,
Mingen Tawın biyik etken.
Hesh jaqtanda járdem kútpey,
Makkarlıqtı qıyıp ótken.
Ózbek, qazaq tuwısqanın,
Bawırına jıyıp ótken.
Márt, bahadır, narım meniń,
Qaraqalpaqstanım meniń.
Kúni keshegi Allayarıń,
Seniń ushın janın tikti.
Babalarım úmitiniń,
Máwriti jetkenin uqtı.
Qanı tamǵan xalıq bayraǵın,
Duwtar menen bálent tuttı.
Óz aldına xalıq etip,
Shegarasın sızıp shıqtı.
229
Soń kúnshildiń ǵıybatınan,
Sibirlerde kúni pitti.
Árman menen alıslarda,
Biywaq sóngen tańım meniń.
Xalqı ushın janı qurban,
Qaraqalpaqstanım meniń.
Aq kewillik qanımızda,
Qırıp alsań izi ketpes.
Haqtı súygen bendelerdiń,
Basınan baxıt, dáwlet ketpes.
Ana-jerim baylıqların,
Sanap kórseń sanaq jetpes.
Neft, gaziń, mramorıń,
Aǵıp turǵan baylıq pitpes.
Nesiybesi mol janım meniń,
Qaraqalpaqstanım meniń.
Ámiw — Aral, eki ashıqtıń,
Kamarınan dóregenbiz.
Keń qushaǵın abat etip,
Ál-hasılǵa bólegenbiz.
Teńizinen marjan súzip,
Qumnan altın elegenbiz.
Biraq suq qol tartıp alıp,
Jábirin biz tólegenbiz.
Kóp úmitli tańım meniń,
Qaraqalpaqstanım meniń.
Qaratawıń baylıq káni,
Qumıń taza xrustaldur.
Topıraǵıń asım-nanım,
Túwesilmes ırısqaldur.
Qarakóliń jaylaw sáni,
Kiyiklerge tuwısqandur.
Qırıńdaǵı qızǵaldaqlar,
Janıp turǵan gúlistandur.
Sawlat penen sánim meniń,
Qaraqalpaqstanım meniń.
Murat shayıq dástúrleri,
Búgin bizde dawam eter.
230
Jas áwladtıń bilim, aqılın,
Sınamaqqa sawal piter.
«Júzden júyrik, mıńnan tulpar»,
Tulpar jolın rawan eter.
Jáhánniń aq otawınıń,
Eń tórinen orın jeter.
Bilim quwǵan elim meniń,
Qaraqalpaqstanım meniń.
Tariyxıńdı dástan etip,
Bır ómirge jırlap ketken,
Sıpıra jıraw, Jiyenińdey,
Bul dúnyadan kimler ótken.
Kúnxoja hám Ájiniyaz,
Shayırlıqta bolǵan hóktem.
Berdaq shayır «Shejire»ńdi,
Ólmes etip aytıp ketken.
Sóz elinde sultanı kóp,
Mıń muqamlı tarım meniń,
Aspanı juldızǵa tolı,
Qaraqalpaqstanım meniń.
Talantlılar makanısań,
Shiyrin lapızlılarǵa baysań.
Hár adamıń shayır seniń,
Sheshenlerge tolı jaysań.
Danalıq, begligiń miyras,
On tórt kúnlik tuwǵan aysań.
Reńinde júz mıń jılwa,
Kóz aladı aqqa jaysam.
Saltanatlı baǵım meniń,
Qaraqalpaqstanım meniń.
Spitamen áwladları,
Jetilisken búgin bizde.
Alpamıstıń zúryatları,
Dárman bolar búgin bizge.
Jáhán ara palwanlıqta,
Erkinbayıń tústi kózge.
Márt, ǵayratlı uǵlanlardı,
Jetildirip ertip izge,
231
Qalqanlarıń bolar seniń,
Qaraqalpaqstanım meniń.
Esabı joq sansız baylıq,
Seniń jerlerińnen óner.
Qayta islewdi qolǵa alsaq,
Jaqsı kúndi kózler kórer.
Dúnya júzi bazarları,
Saǵan doslıq qolın berer.
Ana xalıq hár qádemnen,
Joqlıq emes, altın terer.
Tańir súygen xalqım meniń,
Qaraqalpaqstanım meniń.
Ózbek xalqı óz bawırıń,
Qırǵızlarıń xanalasıń.
Qazaq, túrkmen, sennen nusqa,
Qoy-qozısı qoralasıń.
Awızbirlik úlken dáwlet,
Hár úyde bar aralasıń.
Tájik, azar qol berisken,
Tamırı bir saǵalasıń.
Reńli bostanım meniń,
Qaraqalpaqstanım meniń.
Ǵárezsizlik zaman kelip,
Qurıldı kóp oqıw jaylar.
Kompyuter hám internetler,
San mıń ilim giltin jaylar.
Búgingi kún jas bala hám,
Kompyuterde oyın oynar.
Bilmeytuǵın nársesi joq,
Dúnya tanıp júzi jaynar.
Baxıtlı mákanım meniń,
Qaraqalpaqstanım meniń.
Júz mıń qırlı xalıqsań óziń,
Nurıńnan kóz qamasadı.
Miywası mol baǵsań óziń,
Sabırlılıq jarasadı.
Insanlıqtıń órisiseń,
Jaqsı niyet ulasadı.
232
Seniń baxıtlı erteńińe,
Prezidentiń jol ashadı.
Máńgi jasa elim meniń,
Qaraqalpaqstanım meniń.
Do'stlaringiz bilan baham: |
