Давлатчилик тарихи. Маъруза матни 3-курс 1-Мавзу. Сўнги ўрта асрларда Ўзбек хонликлари

БХСРдаги сиёсий, иқтисодий ва маданий ўзгаришлар. 1921 йил 18-23 сентябрда бўлган Бутунбухоро халк вакилларининг II қурултойида демократик руҳда БХСР Конституцияси қабул қилинди. Марказий Ревком ўрнига қонун чиқарувчи ва назорат қилувчи олий орган – Бутунбухоро Марказий Ижроия Қўмитаси ташкил қилинди. унга таниқли давлат арбоби Усмон Хўжа раис бўлди. У кейинчалик хорижга чиқиб кетгач, 1922-1924 йилларда бу лавозимни Порсо Хўжаев эгаллади. Бироқ БХСР ҳукумати ичида сиёсий бўлинишлар кучайди. Бир томондан, Бухоро Коммунистик партияси ичидаги “сўл” ва “ўнг” коммунистларга қарши ғоявий жиҳатдан кураш олиб боришга тўғри келса, иккинчи тарафдан, РСФСР ва унинг фавқулодда органлари бўлган Турккомиссия, Туркбюро, Туркфронт, Ўрта Осиё бюроси, Ўрта Осиё Иқтосий Кенгаши ёш “мустақил” давлат етакчисининг ҳар бир қадамини сергаклик билан назорат қилиб турди. Шундай бўлишига қарамасдан Файзулла Хўжаев, Абдулқодир Муҳиддинов, Фитрат, Отаулла Хўжаев сингари арбоблар ҳукуматда демократик йўл тутиб, мўътадил мақомда турдилар.
Бухородаги демократик ўзгаришларга мамлакат ташқарисидан тазйиқ тобора кучайиб борди. 1923 йил ёзи ва кузида ташқи кучлар тазйиқи билан Файзулла Хўжаевнинг яқин сафдошлари бўлган Фитрат, Отаулла Хўжаев, Саттор Хўжаев, Муинжон Аминов, Қори Йўлдош Пўлатов ва бошқа нозирлар ҳукумат таркибидан чиқарилди ҳамда Бухородан сургун қилинди. Бухоро ҳукумати Москва ва Тошкентнинг “коммунистча сабоғи”ни олган “тажрибали совет ходимлари” билан тўлдирилди. Ҳукуматда Туркистон АССРдан юборилган комиссарларнинг таъсири тобора кучайиб борди. Жамият тобора сиёсийлашди. 1924 йил 18-20 сентябрда бўлган Бутунбухоро халк вакилларининг V қурултойида БХСРнинг номи ўзгартирилиб, у Бухоро Совет Социалистик Республикаси (БССР)га айлантирилди. Марказ ва Туркистон АССРдаги болшевиклар ва бошқа кучлар Бухорони “социалистик” ўзгартиришлар гирдобига тортишди.

3-машғулот
1.Хива хонлигида хон ҳокимиятининг ағдарилиши.
ХХСР тузилиши ва ислоҳотлар