Давлат ва жамият қурилиши ҳамда ижтимоий-сиёсий соҳадаги ислоҳотлар бўйича саволлар

46. Мамлакатимиз хавфсизлигига, жамият барқарорлигига путур етказувчи қандай мафкуравий таҳдидлар мавжуд, деб ҳисоблайсиз?
Мафкуравий хавф-хатар ва тазйиқларнинг келиб чиқиш мақсад-муддаоси ва кураш усулларига кўра шартли тарзда иккига – Шарқдан ва Ғарбдан кириб келаётган таҳдидларга ажратиш мумкин:

1. 
   Ислом дини ниқоби остида, унинг тушунча ва ғояларини бузиб талқин этиш йўли билан ўзини ниқоблашга уринаётган диний экстремизм, фундаментализм, фанатизм йўналишидаги оқимлар – “ваҳҳобойлик”, “акромийлик”, “ҳизб-ут-таҳрирчилик”, “нурчилик” ва бошқалар.
   
2. 
   Ўзга динларни мусулмон халқлари орасида тарғиб-ташвиқ қилиш орқали жамиятда парокандаликни келтириб чиқаришни ўз олдига мақсад қилиб қўйган миссионерлик, буюк давлатчилик шовинизми, вестернизация (ғарблаштириш), “оммавий маданият” шаклидаги ахлоқий бузуқлик, эстетик ва маънавий айнишга олиб келувчи турфа оқимлар, миллатчилик ва ирқчиликни тарғиб этувчи мафкуравий марказлар фаолияти.
   

47. Дунё миқёсида кузатилаётган глобаллашув инсон ва жамият ҳаётига қандай салбий таъсирлар кўрсатади?
Глобаллашув муайян ҳодиса, жараённинг барча минтақалар, давлатлар ва бутун Ер юзини қамраб олганини ҳамда уларнинг инсоният тақдирига дахлдор эканини англатади. Глобаллашув жараёнининг ҳаётимизга тобора тез ва чуқур кириб келаётганининг асосий сабаби эса, бугунги кунда ҳар қайси давлатнинг тараққиёти ва равнақи нафақат яқин ва узоқ қўшнилар, балки жаҳон миқёсида бошқа минтақа ва ҳудудлар билан чамбарчас боғланиб бораётганидадир. Бирон мамлакатнинг бу жараёндан четда туриши ижобий натижаларга олиб келмайди.
Дунёда глобаллашув, ахборот оқимининг тезлашуви, универсал технологиялар билан боғлиқ умумбашарий жараёнлар жадаллашиб бормоқда. Бундай шароитдан фойдаланиб мафкуравий воситалар орқали ўз таъсир доирасини кенгайтиришга интилаётган сиёсий кучлар ва ҳаракатлар фаолияти ҳам кун сайин кучаймоқда.
Глобаллашувнинг кундалик ҳаётда кузатилаётган ана шундай жиҳатлари дунёни универсаллаштириш, ғарблаштириш назарияси учун замин бўлиб хизмат қиляпти. Натижада, маданий ўзига хослик, турмуш тарзидаги хусусиятлар ва миллий менталитетнинг емирилиши кучаймоқда. Шу туфайли ҳам Ўзбекистон раҳбарияти аҳоли ўртасида диний маърифатни кучайтириш, тўйлар, оилавий тантаналарда кузатилаётган миллий урф-одатларимизга зид бўлган “оммавий маданият” хуружларини бартараф этиш, ёшларнинг ахборот хавфсизлигини таъминлаш чораларини кўрмоқда.