Давлат ва жамият қурилиши ҳамда ижтимоий-сиёсий соҳадаги ислоҳотлар бўйича саволлар

50. Ички хавф-хатарлар таъсири ташқи тажовузникидан асло кам бўлмаслигини нималарда кўриш мумкин?
Коррупция, маҳаллийчилик, порахўрлик, мансабни суиистеъмол қилиш ва бошқа ички хавфлар ҳамда уларга қарши кураш бугунги кунгина эмас, балки барча замонларнинг оғир муаммосидир. Мазкур ички хавфлар нафақат миллат ва халқ бирлигига раҳна солади, балки мамлакат иқтисодиёти, унинг халқаро обрўсига ҳам жиддий путур етказади. Шу туфайли ҳам улардан бутун жамиятнинг огоҳ бўлиши, давлат ва жамият бошқаруви бу иллатлардан тозаланиши янги ҳаётнинг муҳим талабидир.
Айни муаммолар долзарблигидан келиб чиққан ҳолда, Ўзбекистон Республикасининг “Терроризмга қарши кураш тўғрисида”, “Ҳуқуқбузарликлар профилактикаси тўғрисида”, “Коррупцияга қарши кураш тўғрисида”, “Жамоатчилик назорати тўғрисида”ги қонунлар ва Ўзбекистон Республикаси Вазирлар Маҳкамасининг ““Хавфсиз шаҳар” лойиҳасини амалга ошириш бўйича босқичма-босқич чора-тадбирлар ва ягона технологик ёндашувни ташкил қилиш тўғрисида”ги қарори каби бир қатор норматив-ҳуқуқий ҳужжатлар қабул қилинди.
Айни пайтда мазкур норматив-ҳуқуқий ҳужжатларга асосан мамлакат миқёсида қонунийлик ва ҳуқуқий тартиботни мустаҳкамлашга қаратилган амалий ишлар қилинмоқда.
51. Ўзбекистон ташқи сиёсатни амалга оширишда қандай принципларга амал қилади?
Ўзбекистон Республикаси Конституциясининг 17-моддасида “Ўзбекистон Республикаси халқаро муносабатларнинг тўла ҳуқуқли субъекти эканлиги мустаҳкамланган.
Конституцияга асосан Ўзбекистон Республикасининг ташқи сиёсати давлатларнинг суверен тенглиги, куч ишлатмаслик ёки куч билан таҳдид қилмаслик, чегараларнинг дахлсизлиги, низоларни тинч йўл билан ҳал этиш, бошқа давлатларнинг ички ишларига аралашмаслик қоидаларига ва халқаро ҳуқуқнинг умум эътироф этилган бошқа қоидалари ва нормаларига асосланади.
Республика давлатнинг, халқнинг олий манфаатлари, фаровонлиги ва хавфсизлигини таъминлаш мақсадида иттифоқлар тузиши, ҳамдўстликларга ва бошқа давлатлараро тузилмаларга кириши ва улардан ажралиб чиқиши мумкинлиги белгиланган.
Ўзбекистон Республикаси ва хорижий шериклар ўртасида мамлакатимизнинг ижтимоий-сиёсий, ижтимоий-иқтисодий ва бошқа соҳалардаги ўрта ва узоқ муддатли манфаатларига асосланган икки томонлама ҳамда кўп томонлама ҳамкорликни ривожлантириш мамлакатимиз ташқи сиёсатнинг устувор йўналишлари бўлиб келмоқда.