Ctrl+F или ⌘-f (для MacOS) и введите запрос в поле поиска. Мавзу: бухгалтерия баланси

Оддий бухгалтерия проводкаси дейилганида бир ҳисобварақнинг дебетланиши ҳамда иккинчи ҳисобварақнинг кредитланиши тушунилади.
Мураккаб бухгалтерия проводкаси дейилганида эса, бир неча ҳисобварақ дебетланиб, битта ҳисобварақнинг кредитланиши ёки бир ҳисобварақнинг дебетла­ниши ҳамда бир неча ҳисобварақларнинг кредитлани­ши тушунилади. Бир вақтнинг ўзида бир неча ҳисобварақ дебетла­ниб ва бир неча ҳисобварақ кредитланиши ҳоллари юз бермайди.
Оддий бухгалтерия проводкасига қуйидаги бухгалте­рия ёзувини мисол қилиб келтириш мумкин. Масалан, асосий ишлаб чиқаришга 200000 сўмлик материал берилди. Ушбу муомалага қуйидаги проводка берилади:
Д-т 2010—"Асосий ишлаб чиқариш" — 200000 сўм;
К-т 1010—"Хом-ашё ва материаллар" — 200000 сўм.
Юқоридан кўриниб турибдики, корхонада содир бўлган хўжалик муомаласи битта ҳисобварақнинг дебетида, иккинчи ҳисобварақнинг кредитида акс эттирилган.
Энди, мураккаб бухгалтерия проводкасига мисол келтирамиз.
Мисол. Корхонанинг ишчи ва хизматчиларига иш ҳақи ҳисобланди:
1) Асосий ишлаб чиқаришда банд бўлган ишчиларга — 50000 сўм; 
2) Ёрдамчи ишлаб чиқаришда банд бўлган ишчиларга — 20000 сўм;
3) Тайёрлов цехида банд бўлган ишчиларга — 44000 сўм;
4) Корхона бошқарувида банд бўлган ходимларга — 30000 сўм.
Ушбу муомалаларга қуйидаги мураккаб бухгалтерия проводкаси берилади:
Д-т 2010—"Асосий ишлаб чиқариш" — 50000 сўм;
Д-т 2310—"Ёрдамчи ишлаб чикариш" — 20000 сўм;
Д-т 2510—"Умумишлаб чиқариш ҳаражатлари" — 44000сўм;
Д-т 9420—"Маъмурий-бошқарув ҳаражатлари" — 30000 сўм;
К-т 6710—"Ишчи ва хизматчиларга иш ҳақи юзасидан қарзлар" — 144000 сўм.
Юқоридаги муомаладан кўриниб турибдики, хўжа­лик муомаласи таъсирида тўртта ҳисобварақ дебетланган ҳамда битта ҳисобварақ кредитланган.
Шуни таъкидлаб ўтиш лозимки, икки ёқлама ёзиш усули бухгалтерия ҳисобининг муҳим усули сифатида бухгалтерия баланси ва ҳисобварақлар тизими билан чамбарчас боғлиқдир. Чунки хўжалик муомалаларини икки ёқлама ёзганда ҳисобварақлар тизимидан фойдаланилади. Ҳисобварақлар тизимига эса бошланғич маълумотлар бухгалтерия балансидан олинади. Демак, икки ёқлама ёзиш усули бухгалтерия балансидаги тенгликни ҳисобварақлар тизими ёрдамида ҳамма вақт таъминлаб туради.