Buxoro muhandislik- texnologiya instituti

Nazorat va mulohaza uchun savollar

1. 
   Marketing tizimida tovar taqsimotining vazifalarini aytib bering.
   
2. 
   Tovar taqsimoti kanallarini sanab bering.
   
3. 
   Taqsimot kanallarining tashkiliy shakllariga misol keltiring.
   
4. 
   Taqsimlash kanallari qanday tuzilgan?
   
5. 
   Tijorat vositachiligi deganda nimani tushunasiz?
   
6. 
   CHakana savdo xususiyatlarini ajratib bering.
   

17 – MAVZU. ULGURJI SAVDO VA UNING TURLARI
17.1. Ulgurji savdo mohiyati
17.2. Vositachini tanlash va sotish tarmog’ini shakllantiruvchi omillar
17.3. Sotishning yangi turlari, uslublari, shakllari


17.1. Ulgurji savdo mohiyati
Ulgurji sotuvchilar, birinchidan, shakllanadigan tovar assortimentining chuqurligi va kengligi bo’yicha, ikkinchidan, mijozlarga xizmat ko’rsatishning davri bo’yicha farqlanadi. Birinchi yo’nalishdagi ulgurji sotuvchilar assortimentga bog’liq holda tovar guruhining muayyan qismi bilan ishlaydigan tor ixtisoslashgan, bir tovar guruhi bilan ishlaydigan ixtisoslashgan, birgalikdagi — bir nechta tovar guruhlari bilan ishlaydigan va chakana sotuvchilar tovar assortimentining shakllanish xususiyatiga qarab tovarlarning har xil guruhlari bilan ishlaydigan aralash sotuvchilarga bo’linadi.
Ikkinchi yo’nalishdagi ulgurji sotuvchilar xizmat ko’rsatish sikli to’liq bo’lgan ulgurji sotuvchilar va xizmat ko’rsatish sikli cheklangan ulgurji sotuvchilarga ajraladi. Ular o’z navbatida naqd pulli hisob-kitoblarga va tovarlarni etkazib bermasdan savdo qiladigan ulgurji sotuvchilar, ulgurji-kommivoyajerlar, pochta orqali buyurtmalarni qabul qiladigan ulgurji sotuvchilar va ishlab chiqarish kooperativlari (fermer xo’jaliklari assosiasiyalari)ga bo’linadi.
Xizmat ko’rsatish sikli to’liq bo’lgan ulgurji sotuvchilar o’z faoliyatida xizmatlarning butun kompleksini qamrab oladi: tovar zaxiralarini saqlash va shakllantirish, kreditlash, sotuvchilarini tavsiya etish, tovarlarni xaridorlarga etkazib berish, boshqarishda yordam ko’rsatish. Ularga qarama-qarshi holda xizmat ko’rsatish sikli cheklangan ulgurji sotuvchilar, odatda, ularning tavsifi ancha keng namoyish etilgan bo’lsa ham, nisbatan kamroq xizmatlar ko’rsatadi.