Bulardan tashqari, tovush o'zgarishlarining yana quyidagi ko’rinishlari mavjud

Ergashtiruvchi bog‘lovchili ergashgan qo‘shma gaplar

Bilib oling. Bosh gapda ifodalangan mazmunning sababi, maqsadi, sharti yoki qiyosini bildirgan ergash gaplar bosh gapga sabab (chunki, negaki), maqsad (toki), shart (agar, agarda, basharti, mabodo), qiyoslash-chog‘ishtiruv (go‘yo, go‘yoki, xuddi) ergashtiruvchi bog‘lovchilari yordamida bog‘lanadi. Sabab, maqsad, qiyoslash-chog‘ishtiruv bog‘lovchilari ergash gap boshida qo‘llanadi va ergash gap bosh gapdan so‘ng keladi. Bunday vaqtda yozuvda ergash gap bosh gapdan vergul bilan ajratiladi.

Shart bog‘lovchilari gap boshida keladi. Ergash gap kesimi shart maylidagi fe’llar bilan ifodalanadi. Bunday ergash gaplar bosh gapdan oldin keladi. Ko‘pincha shart bog‘lovchilari qo‘llanmasa ham, shart mayli shakli qo‘shma gap qismlarini bog‘layveradi.

Ergashtiruvchi bog‘lovchilar o‘zining ma’nosiga mos ravishda ergash gapga sabab, maqsad, shart, o‘xshatish kabi ma’nolarini beradi. Shuning uchun ergash gapli qo‘shma gaplar “sabab ergash gapli qo‘shma gaplar”, “maqsad ergash gapli qo‘shma gaplar” kabi mazmuniy turlarga ham bo‘linadi.