Бухгалтерия ҳисобининг халқаро стандарти 8 Ҳисоб сиёсатлари, ҳисоблаб чиқилган баҳолардаги ўзгаришлар ва хатолар

БҲХС 8

Бухгалтерия ҳисобининг халқаро стандарти 8
Ҳисоб сиёсатлари, ҳисоблаб чиқилган баҳолардаги ўзгаришлар ва хатолар
Мақсади
1 Ушбу Стандартнинг мақсади ҳисоб сиёсатини танлаш ва ўзгартириш учун мезонларни ўрнатиш ҳамда ҳисоб сиёсатидаги ўзгаришлар, ҳисоблаб чиқилган баҳолардаги ўзгаришлар ва хатоларни тузатишни ҳисобга олиш тартибини ва уларга тегишли очиб бериладиган маълумотларни белгилашдан иборатдир. Ушбу Стандарт тадбиркорлик субъектининг молиявий ҳисоботларида акс эттирилган ахборотнинг ўринлилиги ва ишончлилиги ҳамда бу молиявий ҳисоботларнинг даврларо ва бошқа тадбиркорлик субъектларининг молиявий ҳисоботлари билан қиёсланувчанлигини оширишга қаратилган.
2 Ҳисоб сиёсатини очиб бериш бўйича талаблар, бундан ҳисоб сиёсатидаги ўзгаришларни очиб беришни истисно қилган ҳолатда, БҲХС 1 “Молиявий ҳисоботларни тақдим этиш”да ўрнатилган.
Қўллаш доираси
3 Ушбу Стандарт ҳисоб сиёсатини танлашда ва қўллашда, шунингдек ҳисоб сиёсатидаги ўзгаришларни, ҳисоблаб чиқилган баҳолардаги ўзгаришларни ва олдинги давр хатоларини тузатишни ҳисобга олишда қўлланилиши керак.
4 Олдинги давр хатоларини тузатишнинг ва ҳисоб сиёсатидаги ўзгаришларни қўллаш учун қилинган ретроспектив тузатишларнинг солиқларга бўлган таъсири БҲХС 12 “Фойда солиқлари”га мувофиқ ҳисобга олинади ва очиб берилади.
Таърифлар
5 Ушбу стандартда қуйидаги белгиланган маънодаги атамалардан фойдаланилади:
Ҳисоб cиёсати – бу тадбиркорлик субъекти томонидан молиявий ҳисоботларни тайёрлашда ва тақдим этишда қўлланиладиган муайян тамойиллар, усуллар, одатлар, қоидалар ва амалиётлардир.
Ҳисоблаб чиқилган баҳодаги ўзгариш - активлар ва мажбуриятларнинг жорий ҳолатини ҳамда улар билан боғлиқ бўлган, келгусида кутилаётган манфаат ва мажбуриятларни баҳолаш натижасида, актив ёки мажбуриятнинг баланс қийматини, ёки активдан даврий фойдаланиш суммасини тузатишдир. Ҳисоблаб чиқилган баҳодаги ўзгаришлар янги маълумотлар олиниши ёки янги ҳодисалар рўй бериши натижасида юзага келади, ва, шу сабабдан, хатоларни тузатиш бўлиб ҳисобланмайди.
Молиявий Ҳисоботнинг Халқаро Стандартлари (МҲХСлар) Бухгалтерия Ҳисобининг Халқаро Стандартлари бўйича Кенгаш (БҲХСК) томонидан чиқарилган стандартлар ва шарҳлардир. Улар қуйидагилардан иборат:
(a) Молиявий Ҳисоботнинг Халқаро Стандартлари;
(б) Бухгалтерия Ҳисобининг Халқаро Стандартлари;
(в) МҲХСларга Шарҳлар бўйича Қўмита (МҲХСШҚ) томонидан чиқарилган шарҳлар; ва
(г) Шарҳлар бўйича Доимий Қўмита (ШДҚ) томонидан чиқарилган шарҳлар.¹