Бухгалтерия ҳисобининг халқаро стандарти 8 Ҳисоб сиёсатлари, ҳисоблаб чиқилган баҳолардаги ўзгаришлар ва хатолар

(iii) бетараф, яъни холис;
(iv) эҳтиёткор; ва
(v) барча муҳим жиҳатларда тўлиқ.
11 Юқоридаги 10-бандда зикр қилинганидек мулоҳаза қилишда, раҳбарият қуйидаги манбаларга қараши ва уларнинг қўлланилиши мумкинлигини пасайиб борувчи тартибда кўриб чиқиши керак:
(a) МҲХСларда шунга ўхшаш ёки боғлиқ масалаларга тегишли талаблар; ва
(б) Концептуал асосда³ келтирилган активлар, мажбуриятлар, даромадлар ва харажатларнинг таърифлари, тан олиш мезонлари ва баҳолаш концепциялари.
12 Юқоридаги 10-бандда зикр қилинганидек мулоҳаза қилишда, раҳбарият, шунингдек, стандартларни ўрнатадиган ва бухгалтерия ҳисоби бўйича стандартларни ишлаб чиқишда ўхшаш концептуал асосдан, бошқа бухгалтерлик адабиётлардан ва ушбу соҳада қабул қилинган амалиётлардан фойдаланадиган бошқа идоралар томонидан энг сўнгги чиқарилган стандарт тусидаги хужжатларни, улар 11 бандда келтирилган манбаларга зид келмаслиги шарти билан, эътиборга олиши мумкин.
Ҳисоб сиёсатларининг изчиллиги
13 Тадбиркорлик субъекти ўхшаш операциялар, бошқа ҳодисалар ва шароитларга тегишли ҳисоб сиёсатларини изчил равишда танлаши ва қўллаши керак, агар қандайдир МҲХС моддаларнинг ҳар хил ҳисоб сиёсатлари тўғри келиши мумкин бўлган тоифаларга бўлинишини алоҳида талаб этмаса ёки рухсат этмаса. Агар қандайдир МҲХС моддаларнинг бундай тоифаларга бўлинишини талаб этса ёки рухсат этса, бундай ҳар бир тоифага тегишли бўлган ҳисоб сиёсати изчил равишда танланиши ва қўлланилиши керак.
Ҳисоб сиёсатларидаги ўзгаришлар
14 Тадбиркорлик субъекти ҳисоб сиёсатини фақат қўйидаги ҳолларда ўзгартириши керак:
(a) агар ўзгартириш МҲХС томонидан талаб этилса; ёки
(б) агар ўзгартиришнинг натижасида молиявий ҳисоботларда тадбиркорлик субъектининг молиявий ҳолатига, молиявий натижаларига ёки пул оқимларига операцияларнинг, бошқа ҳодисаларнинг ва шароитларнинг таъсири тўғрисида ишончли ва ўринлироқ маълумотлар акс эттирилса.
15 Молиявий ҳисоботдан фойдаланувчилар тадбиркорлик субъектининг ҳар хил даврларга тегишли молиявий ҳисоботларини унинг молиявий ҳолати, молиявий натижалари ва пул оқимларидаги тенденцияларни аниқлаш учун таққослаш имкониятига эга бўлишлари керак. Шунинг учун, бир давр мобайнида ҳамда даврдан-даврга бир хил ҳисоб сиёсатлари қўлланилади, токи ҳисоб сиёсатидаги ўзгариш 11 бандда келтирилган мезонларнинг биттасига жавоб бермагунича.