Болалар жарроҳлигининг ривожланиш тарихи. Замонавий текшириш усуллари. Болалар жарроҳлигида деантология. Қорин бўшлиғида ўткир жараёнлар (аппендицит, перитонит, орттирилган ичак тутилишлари). Болаларда диафрагмал чурралар

Дифференциал диагнози. Касалликни абсцесс, сарамас, гидраденит, лимфангит, тромбофлебит ва остеомиелитлардан фарқлаш лозим.
Давоси. Флегмона билан оғриган беморлар шифохона шароитида даволанади. Уларга ётоқ тартиби, кўп суюқликлар ичиш, юқори калорияли, витаминларга бой ва енгил ҳазм бўлувчи овқатлар тавсия этилади. Даволаш фаол равишда йирингли инфекцияни даволашнинг 3 та қоидаси асосида олиб борилади. Касаллик чақирувчиларига таъсир қилиш мақсадида антибиотиклар ва сульфаниламид препаратлар қўллани­лади. Маҳаллий даво асосан оператив йўл билан амалга оширилади. Касалликнинг дастлабки босқичида яллиғ­ланиш ўчоғига УВЧ терапия ва малҳамли боғламлар қўйилади. Йиринг ҳосил бўлганига шубҳа қилинганда оператив даво ўтказишни тақоза этади. Операциядан кейинги жароҳатга УВЧ ва гелий-неонли лазер тавсия қилинади.
Панариций
Бармоқ соҳаси тўқималарининг, шу жумладан тери, тери ости ёғ клетчаткаси, пай, суяк ва бўғимларнинг йирингли яллиғланишига панариций дейилади.
Этиопатогенези. Касалликни асосан стафилококк, стафилококк ассоциациялари, кам ҳолларда стрептококк ва бошқа микроблар чақиради. Касаллик ривожланиши бармоқларнинг анатомо-физиологик хусусиятларига, бола организми иммуно­биологик реактивлигига ва микробларнинг вирулентлигига боғлиқ бўлади. Бармоқлар кафт юзаси терисидан фиброз толаларнинг пай қинларига ва суякка қараб кўндаланг тартибда кетиши кафт терисининг зичлашишига сабаб бўлади. Шунинг учун ҳам, яллиғланиш ўчоғида ҳосил бўлган йиринг кўпинча теридан ташқарига эмас, балки чуқур жойлашган тўқималарга қараб тарқалади.
Клиникаси. Касалликнинг клиник манзараси панариций туридан келиб чиққан ҳолда ҳар хил бўлади.
Тери панарицийси. Бу кўпинча ёш болаларда учрайди. Бунда яллиғланиш жараёни эпидермис остида жойлашади. Касаллик бармоқнинг кафт ва орқа юзасида ва 3 та фалангасида жойлашиши ҳамда атрофга тарқалишга мойиллиги билан характерланади. Яллиғланиш бармоқнинг маълум бир соҳасида шиш ва қизариш пайдо бўлиши билан бошланади. Кейин у эпидермисни пуфакча шаклида кўчиради ва юпқалашган тери остидан йирингга ўхшаш суюқлик кўзга ташланиб туради. Пуфакча ичидаги суюқлик серозли, йирингли ва геморрагик бўлиши мумкин. Панарицийнинг бошқа турларидан фарқли ўлароқ, касалликнинг бу шаклида оғриқ унчалик кучли бўлмайди ва бармоқ функцияси ҳам бузилмаган бўлади. Айрим пайтлари тери панарицийси регионал лимфангит ва лимфаденит клиникасини келтириб чиқаради.