Биринчи суҳбат

«Муқаддас китоб» - “Библия” ва унинг таркибига кирувчи китоблар номи.
“Муқаддас ривоятлар” – “Библия” таркибига кирмаган, черков авлиёлари томонидан қабул қилинган ҳужжатлар ва номалар.
Муқаддас Руҳ – христианликда Худонинг уч кўринишидан бири. Муқаддас Руҳ дунёнинг яралишида иштирок этган, Биби Марям ҳам у орқали Исога хомиладор бўлган.
Необуддизм – (“нео” - янги). XIX-XX асрларда буддавийликда пайдо бўлган йўналиш. Турли давлатларда турлича шакл касб этган. Необуддизм таълимотида миллий озодлик ҳаракатлари доирасида будда роҳибларининг сиёсатга аралашишига рухсат берилган.
Нирвана - (санскритча - куч-қувватдан қолиш, интиҳо) – буддавийликда азоб-уқубатлардан қутилиш ҳолати. Нирванага эришиш ҳар бир буддавийнинг асосий мақсади бўлиб, шу сабабли у қайта туғилиш занжири - “сансара” дан озод бўлади.
Ота Худо - Христианликда Худонинг уч кўринишидан бири ва асосийси. Ота Худо дунёни яратган бўлиб, учликнинг қолган кўринишлари (Ўғил Худо ва Муқаддас Руҳ) ундан келиб чиққан.
“Оқ” ва “қора” руҳонийлар – православ руҳонийлари қатлами. “Оқ” руҳонийлар оила қуриш ҳуқуқига эга, “қора” руҳонийларга эса оила қуриши мумкин эмас.
Пастор (лотинча - чўпон) – протестантликдаги черков раҳбари. Пасторлар оммавий ибодатларда маърузалар ўқиш ва черковнинг ички фаолиятини бошқариш билан шуғулланади.
Пасха (юнонча, ивритча – “ёнидан ўтиш”) – христианликдаги асосий диний байрамлардан бири. Исо Масиҳнинг қайта тирилган куни шарафига нишонланади. Ҳозирги кунда Пасха куни Ой-Қуёш календари асосида ҳисобланиб, ҳар йили ўзгариб туради.
“Пятидесятниклар” - протестантликдаги энг йирик оқимлардан бири. Ўзларини Исо вафотидан 50 кун ўтгач Муқаддас Руҳ инъомига эга бўлиб, турли нотаниш тилларда гапира бошлаган ҳаворийларнинг издошлари, деб ҳисоблаганлари учун шу номни қабул қилганлар.
Пресвитер (юнонча, лотинча — “оқсоқол, жамоа бошлиғи”) – христиан руҳонийлик иерархиясида юқори ўринни эгалловчи диний лавозим. Қадимда епископлар ҳам пресвитер деб аталишган.