Biriktiriw usılları

2.6.3. Detallardı biriktiriwde sıpat usılı. Sıpatsızlıq túrleri hám olardı joq etiw texnologiyası.

Detallardı biriktiriwde shege menen biriktiriw aqırınan hám ortasınan bolıp bóliniwi múmkin.

6-súwret Shege menen biriktiriw. 1- aqırınan, 2-ortasınan.

Tiykarınan buyımnıń juqa detalın qalıń detalǵa shegelew kerek. Biriktiriliwshi detallar qanshalıq qalıń bolsa shegeniń diametri de sonday bolıwı kerek. Detallar bekkem biriktirilip shegeleleniwi ushın shegeniń uzınlıǵı biriktiriliwshi ústingi detaldıń qalıńlıǵınan 2-3 mártebe úlken bolıwı kerek. Biriktiriw jaqsı boladı, eger aǵash materialdıń kese talshıǵın orap qaǵılsa bekkem, uzınına qaǵılsa- bekkemligi azıraq boladı.

7-súwret. Detallardı shege menen biriktiriw. a – kese talshıq, b- tiykarǵı detaldıń uzınına talshıq. 1- shege, 2- biriktiriliwshi detal, 3- tiykarǵı detal.

Shegelerdi qaǵıwda olar qıysayıwı múmkin, bunda onı arnawlı shege suwırǵıshı bar balǵada, astına aǵash taxta qoyıp shege suwırǵısh balǵa menen yamasa atawız benen suwırıp alıw kerek. Suwırıp alınǵan shegeni tuwrılaw ushın onı metal listtiń yamasa qattı aǵash taxtashanıń ústine qoyıp, qalpaǵınan atawız benen uslap turıp balǵa menen urıp tuwrılanadı.

8-súwret. Shegelerdi suwırıp taslaw usılı. a- balǵa menen, b- atawız benen.

Eger shegelerdi qaǵıwda shegeniń razmeri biriktirilip atırǵan detallardıń ekewiniń qalıńlıǵınan úlken uzınlıqta bolsa, buyım sıpatı buzıladı, onıń sıpatın asırıw ushın, shegeniń shıǵıp turǵan bólimin sulıw etip qayırıp ushı aǵashqa balǵa menen qaǵıladı. Sonda buyımdı paydalanıwda qolaysızlıq, jaraqatlanıw júz beriwiniń aldın alǵan bolamız hám buyımımız arqadan da sulıw bolıp kórinip turadı.

9-súwret. Astınnan shıqgan shegelerdi qayırıw usılı.

Eger detalǵa qaǵılǵan shege jaqsı qaǵılmastan qıysayıp ketse onda onı balǵa menen suwırıp alıw kerek. Suwırıp alǵannan keyin onı taslamastan tuwrılawımız múmkin. Onıń ushın shegeni aǵash brus ústine qoyıp, qalpaǵınan atawız benen uslap turıp balǵa menen aqırın urıp tegisleymiz. Atawız benen qalpaǵınan uslap turıwımızdıń sebebi, eger qol menen uslasaq qolımızdı balǵa menen urıp alıp jaraqatlanıp qalıwımız múmkin. Sonıń ushın shegelerdi tuwrılaw jumıslarında da texnika qáwipsizlik qaǵıydasın saqlawımız kerek.

10-súwret. Qıysayǵan shegeni brus ústinde tuwrılaw.