Баҳодир эгам

20 январь, 2017 йил.




ОТАГИНАМ
Оппоқ соқол, оқ яктакли отагинам,
Ширин сўзли, пок тилакли отагинам,
Ҳаммадан ҳам сиз юракли, отагинам,
Ҳар офатда халоскорим, отажоним,
Ҳам тождорим, ифтихорим, отажоним.

Ул муқаддас китобларни ёдлар этган,

Пайғамбарнинг руҳларин шодлар этган,
Отажоним ҳур, муборак зотлар экан,
Доно, дилкаш, беғуборсиз отагинам,
Сиз қанчалар улуғворсиз, отагинам.

Ғайридинлар Қуръон ўқимоқни гуноҳ, деди,

У дунё йўқ, йўқ ҳеч қандай Оллоҳ деди,
Партияни ота деди, паноҳ деди,
Бу сўзларни айтма, деган отагинам.
Ўзлигингдан қайтма, деган отагинам,

Ўзбегим ҳам ўзлигини топди бугун,

Оллоҳ ўзи ёрлақади бизни бугун,
У қора кун ортда энди, бу ёруғ кун,
Кошки эди кўрсангиз-а, отагинам,
Дуо қилиб турингиз-а, отагинам!

Отажоним, руҳингизни мен шод этай,

Ул муқаддас китобларни ҳам ёд этай,
Сизнинг шону шаънингизга шеърлар битай,
Оппоқ соқол, оқ яктакли отагинам,
Сиз жаннати, ўт юракли отагинам!

Барча масжид, мадрасалар обод бўлди,

Китоблари, даъватлари ҳам ёд бўлди,
Пайғамбарнинг руҳлари ҳам шод бўлди,
Бу кунларни кўрсангиз-а, отагинам,
Даврон суриб юрсангиз-а, отагинам!

Отажоним, эсламаган бир куним йўқ,

Оллоҳимга зикр қилмаган туним йўқ,
Сиздан бўлак орқа тоғ, устуним йўқ,
Пок руҳингиз қўллар бизни, отагинам,
Тўғри йўлга бошлар бизни отагинам.

Ҳаж сафари Сизга армон бўлиб қолди,

Худо сизнинг қалбингизга ларза солди,
Ўғлонлариз ҳожи мақомларин олди,
Ижобатдир дуойингиз, отагинам,
Энди ҳурлик, саодатдир отагинам!


БЕҒАРАЗ ДЎСТ
Беғараз дўст, энг улуғ устоздир китоб,
Қанча бўлса жовонингда шунча оздир китоб,
Қалбга ёлқин, онгга шуур, сарафроздир китоб,
Берилиб бир ўқисанг, қанчалар создир китоб.

Сенга устозлик қилару таъна, дашном отмагай,

Суҳбатингни ўрталаб, бемаъни сўзлар қотмагай,
Кўнглига на гумону на шубҳа ўйғотмагай,
Шунчалар дўсту қадрдон, шунчалар создир китоб.

Кимки фарзандин камолин чиндан ўйласа,

Одамийлик, меҳру оқибатдан сўйласа,
Уйининг энг тўрида муҳтарам бўлсин китоб,
Қалбининг энг қўрида муҳтарам бўлсин китоб!