Azərbaycan miLLİ elmlər akademiyasi folklor institutu azərbaycan folkloru antologiyasi (Cəbrayıl, Ağdam, Laçın, Qubadlı, Zəngilan, Ağcabədi və Kəlbəcər rayonlarından toplanmış folklor nümunələri) baki – “Nurlan“ – 2012

XII mətn

Bular (Aşıq Abbasın nəsli – top.) Gümüşdü Alının nəslinnəndi. Vəznəsi, çuxası, xənçəli gümüşdən bağlanmışmış, ona görə Gümüşdü Alı deyirmişdər. Qardaşı Alpənah bir də bacıları ilə gəliflər Piçənisə. Bular gedif toy aparırmışdar. O vaxdı bütün toyları yaylaxda eliyirmişdər. Fərraşdı Aşıx Baxşəli kamança çalır, Aşıq Abbas nağara çalandı, Dəli dağa toya gedillər. Orda qadın zakaz eliyif, mahnının adını düz demiyif. Deyif, ağa, bozatdı çal. Elə bir vəziyyət oluf ki, tayfalar arasında giley-güzar varmış. Olar elə biliflər ki, bular aşıxları örgədif çalmasın. Abbas deyif, bir ayna get, bir bayana gəl, görüm sən nə mahnı isdiyirsən? Qadının hərəkətinnən bilif o nə mahnı isdiyir. Oynayan kimi deyif, Ağabala Rizayini isdiyir.