Avtomobil elektr jihozlariga qo‘yiladigan asosiy texnik talablar

Akkumulatorlarning volt-amper tavsifnomasi

Dvigatelni ishga tushirish tizimini loyihalashda va hisoblashda akkumulatorlar batareyasining volt-amper tavsifnomasi muhim ahamiyatga ega. Akkumulatorning volt-amper tavsifnomasi deb, razryad kuchlanishi Ur ning razryad toki Ir ga bog‘liqligiga aytiladi (1.48-rasm). Akkumulatorning volt-amper tavsifnomasi tajriba yoki razryadlanishning berilgan shartlari asosida hisoblash yo’li bilan olinadi.

Volt-amper tavsifnomasining asosiy qismi deyarli to’g‘ri chiziqli qonuniyat bo’yicha o’zgaradi, lekin razryadning boshlanishida va oxirida akkumulatorda sodir bo’ladigan qutblanish jarayonlari ta’sirida tavsifnoma egri chiziq ko’rinishiga ega bo’ladi.

Startor rejimidagi razryad toklarining qiymati asosan volt-amper tavsifnomaning to’g‘ri chiziqli qismida bo’lganligi sababli, dvigatellarning ishga tushirish tizimini hisoblashda, egri chiziqli qismi to’g‘rilangan tavsifnomadan foydalaniladi. Buning uchun volt-amper tavsifnomaning to’g‘ri chiziqli qismini kuchlanish va tok o’qlari bilan kesishguncha ikkala tomonga davom ettiriladi. Bu to’g‘ri chiziqning koordinata o’qlari bilan kesishgan nuqtasida boshlang‘ich razryadlanish kuchlanishi Ubr va qisqa tutashuv toki Iqt ga mos keladigan kesmalar ajratiladi. Bu ikki nuqtadan o’tkazilgan to’g‘ri chiziq akkumulatorning to’g‘rilangan volt-amper tavsifnomasini ifodalaydi.