Atrof-muhitni muhofaza qilishning tashkiliy va huquqiy asoslari

2.3. O’zbekistonda atrof-muhitni muhofaza qilishning huquqiy asoslari

Ekologiya qonunlari

Dunyodagi barcha ijtimoiy-iqtisodiy, ijtimoiy-siyosiy va ekologik jarayonlar o’zaro chambarchas bog’liqdir. Ekologiyasiz iqtisodiyot va iqtisodiyotsiz ekologiya bo’lmaydi. Biosfera komponentlari orasidagi turli xil aloqalar, biogeosenoz elemetlari orasidagi o’zaro bog’liqliklar, tabiat taraqqiyoti va o’z-o’zini mukammalashtirishi ekologiyaning 4 ta qonuniga o’z aksini topgan. Ekologiya qonunlari birinchi marotaba 1974 yilda Amerikalik olim Barri Kommoner tomonidan fanga kiritilgan edi.
1-qonun. Tabiatdagi barcha moddalar va hodisalar o’zaro bog’liq. Ushbu qonun biosferadagi barcha tirik organizmlar va ularni o’rab turgan tabiiy muhit orasidagi turli xil va shakldagi bog’liqiliklarni o’ziga aks ettiradi. Tabiiy muhitning fizikaviy-kimiyoviy holatining har bir o’zgarishi aloqalar orqali biogeosenozlarga beriladi, natijada ularning rivojlanishiga katta ta’sir yetadi.
2-qonun. Hamma narsalar qayergadir yashirinishi kerak. Har bir narsa izsiz yo’qolmaydi, balki bir joydan ikkinchi joyga ko’chishi mumkin, bir molekulyar holatdan ikkinchisiga o’tishi mumkin. Bunday o’zgarishlar tirik organizmlarning yashash jarayoniga ta’sir yetadi. Masalan, yog’ingarchiliklar ko’proq sodir bo’lganda, tabiiy iqlim o’zgarib o’simliklar rivojlanishiga katta ta’sir etishi mumkin. Yoki yer qa’ridan qazib olinadigan ma’danlar, neft va gazlardan yangi moddalar va birikmalar olinadi. Ammo texnologik jarayonlar davomida ajralib chiqadigan chiqindilar tabiatga yoyilib ketgan.
3-qonun. Biron-bir narsa tekinga berilmaydi. Boshqacha qilib aytganda, har bir narsa uchun, shu jumladan, tabiatdan foydalanish uchun ham, to’lash kerak. Global ekologik tizimda, ya’ni biosferada har qanday foyda ko’rishlar, albatta, talofatlar bilan birga qo’lga kiradi. Ushbu talofat esa boshqa joyda paydo bo’ladi. Tabiatdan olingan har bir narsaning joyi albatta, to’ldirilishi shart. Masalan, bug’doy, arpa, ko’katlar va boshqa mahsulotlar yerdan fosfor, kaliy va shunga o’xshagan elementlarni oladi. Agar yerga ushbu kerakli elementlarni mineral o’g’it sifatida bermasak, kelgusida hosildorlik pasayib ketadi.