Антидеприссантлар

МАО ингибиторлари.
МАОни (МАО-А ва МАО-В ларни) танламасдан блокловчи воситалар юқори заҳарлиликка эга эканликлари сабабли нисбатан камроқ ишлатилади. Улар норадреналин ва серотониннинг оксидланувчи дезаминланишини блоклашлари ҳисобига бош мия тўқималарида катта миқдорда тўпланиб қолишига олиб келади. Кўпчилиги МАОни қайтмас даражада блоклайди. Натижада МАО фаоллигининг қайта тикланиши учун у янгидан синтезланиши керак, бунга эса узоқ вақт талаб қилинади (2 ҳафтагача). МАО ингибиторларининг антидепрессив самараси 7-14 кундан кейин ривожланади.
Уларда антидепрессантлик хоссаси билан бирга кучли психостимулловчи самара ҳам мавжуд (эйфория, руҳий қўзғалиш, уйқусизлик ва б. кузатилади). МАО интибиторлари симпатомиметиклар (фенамин, эфедрин ва тирамин) таъсирини кучайтиради. Шунингдек, пишлоқ, қаймоқ, вино, пиво каби маҳсулотлардаги моноаминлар МАО иштирокида ичакда парчаланди. МАО ингибиторлари таъсирида улар парчаланмасдан ичак орқали сўрилиб, қон томирларини торайтиради ва АҚБнинг ошиб кетишига олиб келади (пишлоқ синдроми). Шунинг учун пархез сақлаш лозим.
МАО ингибиторларининг юқори заҳарлилиги уларнинг бошқа кўпгина ферментлар фаоллигини (масалан, жигар микросомал ферментларини) сусайтириши билан боғлиқ. Бунинг натижасида улар наркоз воситаларининг, фенотиазин қатори нейролептикларининг, опиоид анальгетикларнинг, тутқа-ноққа қарши воситаларнинг ва б. самараларини узайтирадилар.
МАО ингибиторлари гипотензив фаолликка эга. Стенокардияда оғриқ-ни камайтиради. МИЙдан яхши сўрилади, буйраклар орқали ажратилади. Заҳарлилиги ўта юқори, айниқса жигарга нисбатан (кўпинча оғир гепатит келиб чиқиши мумкин). МНСнинг қўзғалиши натижасида уйқусизлик, тремор ва мушаклар тартишиши пайдо бўлиши мумкин. Баъзан ортостатик гипотония кузатилади. Қарамлик келиб чиқмайди.
Ҳозирда тиббиёт амалиётида МАО ингибиторлари сифатида жуда кам миқдордаги гидразин унумлари қўлланилади. Ниламид (ниамид, нуредал) – самарадорлиги анчагина паст бўлган антидепрессант бўлиб, жигарга заҳарлилиги ва ножўя таъсирлари жуда кам. Ниламиднинг терапевтик таъсири 12-14 кундан кейин юзага чиқади. Даволаш 1-6 ой давом этади.