Antidangasalik

Linenberger tizimi

Prokrastinatolog Maksim Darafeyevning kitobida shunday tadqiqot²³ keltiriladi: intellektual qobiliyatlari taxminan bir xil bo‘lgan odamlarni ikki guruhga ajratib olishgan. Birinchi guruhga o‘nta topshiriq birdaniga berilgan, ikkinchi guruhga esa bitta topshiriqni bajarib bo‘lishi bilan ikkinchisi berib borilgan. Kun oxiriga kelib natijalarga qaralganda birinchi guruh topshiriqlarning 50-60 foizini, ikkinchi guruh esa topshiriqlarning 95-100 foizini bajarganiga guvoh bo‘lishgan. Shu bois ham Linenberger tizimida topshiriqlarni stikerlarga yozish tavsiya qilinadi. Har kuni kechqurun uxlashdan oldin ertangi kunda bajarmoqchi bo‘lgan topshiriqlaringizning har bittasini bitta stikerga yozib olasiz va har ikkita sitikerni bloknotingizning bitta betiga yopishtirasiz. Stikerlarni bloknotning ikkinchi betidan yopishtirib borishingiz kerak bo‘ladi. Birinchi betga birorta topshiriqni tanlab yopishtirasiz.
Bloknotning birinchi beti siz uchun topshiriqlarning bajarilish joyi vazifasini o‘taydi. Bu qismga yopishtirilgan topshiriq albatta bajarilishi shart. Buni o‘zingiz uchun qonun qilib olganingiz yaxshi. Undan tashqari, agar sizda topshiriqlarni yozish jarayoningizda ertaga emas, bir necha kundan keyin qilishingiz mumkin bo‘lgan ishlaringiz chiqib qolsa, ularni ham stikerga yozib, bloknot markaziga yopishtirishingiz kerak bo‘ladi. Bloknot markaziga yozilgan topshiriqlarni bajarish vaqti kelganida ularni birinchi betlarga olib qo‘yasiz. Topshiriqni bajarib bo‘lishingiz bilan stikerni olib tashlaysiz va keyingi topshiriq yozilgan stikerni birinchi betga yopishtirib, bajarishda davom etasiz. Birorta topshiriqni bajarib bo‘lganingizdan keyin bloknotning orqa tarafiga yopishtirib qo‘yib, kechqurun ularni sarhisob qilishingiz, nechta topshiriq bajarganingizni belgilab olishingiz mumkin.
Avvalroq aytganimizdek, biz bu yerda energiyani markaziylashtirib olyapmiz. Shu bois siz topshiriqlaringizga vaqt belgilashingiz yoki ketma-ketlikda yozishingiz shart bo‘lmaydi. O‘zingizning fiziologik holatingizdan kelib chiqqan holda topshiriqlardan birortasini tanlab, bajarishni boshlaysiz. Endi topshiriqlarni qanday qilib to‘g‘ri yozish haqida gaplashamiz.