Андижон давлат университети тарих факультети

2. Курс иши мавзуларини танлаш ва тасдиқлаш
Курс иши мавзулари мутахассис тайёрловчи кафедралар томонидан кадрлар истеъмолчилари таклифларини ҳисобга олган ҳолда белгиланади ва университет илмий кенгашида тасдиқланади. Курс иши мавзулари амалдаги Низомга асосан ҳар ўқув йили бошида кўриб чиқилади.
Курс ишининг мавзулар рўйхати одатда учинчи курс биринчи ярми якунида талабалар эътиборига ҳавола қилинади. Талабаларга рейтинглари камайиши тартибида курс ишлари мавзуларини танлаш ҳуқуқи берилади.
Курс иши мавзуси танлангандан кейин кафедра томонидан талабага раҳбар бириктирилади. Декан тақдимномасига асосан талаба курс иши мавзуси ва унинг раҳбари ректор буйруғи билан расмийлаштирилади.
3. Курс ишига раҳбарлик қилиш
Курс ишига раҳбарликка мутахассислик кафедраси тавсиясига кўра университет профессор-ўқитувчилари ёки бошқа муассасаларда иш олиб бораётган етук мутахассислар тайинланади.
Курс иши раҳбари вазифаси:
• курс иши бўйича топшириқ бериш;
• ишнинг бажарилишини режалаштириш;
• мавзу бўйича дастлабки маълумотлар берувчи адабиётлар рўйхати ва бошқа ахборот ресурсларини тавсия қилиш;
• курс иши бажарилишини назорат қилиш;
• курс ишини талаба томонидан мустақил бажарилишини таъминлаш;
• курс ишининг бажарилиш сифатига ва талаба муаллифлигига масъул бўлиш.
Курс иши бўйича топшириқ шакли университет ўқув-услубий бўлими томонидан ишлаб чиқилган бўлиб, у иловада келтирилмоқда.
Курс иши бўйича топшириқда ишнинг мавзуси, буйруқ билан тасдиқланиш санаси, ишни топшириш муддати, ишнинг мақсади ва вазифалари, ишни бажариш режаси келтирилган бўлиб, уни курс иши раҳбари ва кафедра мудири имзолайди. Талаба эса “топшириқни олдим” деб имзо қўяди. Курс иши бўйича топшириқ икки нусхада тўлдирилиб, факультет декани томонидан тасдиқланади. Курс иши бўйича топшириқнинг бир нусхаси талабага берилади, иккинчи нусхаси кафедрада сақланади.
Курс иши раҳбари таклифига биноан, ишнинг айрим бўлимлари бўйича етакчи олимлар ва мутахассислардан маслаҳатчилар тайинланиши мумкин. У ҳолда курс иши бўйича топшириқнинг тегишли банди тўлдирилади.
Курс ишини ўз вақтида тўла бажарилиши ва сифатли қилиб тайёрланиши кўп жиҳатдан ишни бажариш режасининг тўғри тузилганига боғлиқдир.
Курс ишини бажариш режаси бевосита раҳбар бошчилигида ишлаб чиқилади. Режада амалга ошириладиган ишлар босқичма-босқич кўрсатилиб (адабиётлар билан ишлаш, тажрибалар ўтказиш, маълумотларни йиғиш, ҳисоб-китоб ишлари, қўлёзма вариантини қоралаш, чизма ва расмларни тайёрлаш, оққа кўчириш ва ҳ.к), уларни бажариш муддатлари аниқ кўрсатилади.